| 章節 | 現代台語漢字2021版經文 |
| 5:1 | 耶路撒冷的罪惡 著行透耶路撒冷的街路， 四界探聽， 佇城門口尋， 看會當尋著一個行公義，追求真誠的人抑無； 若有，我就欲赦免此個城。 |
| 5:2 | 𪜶雖然指活活的上主咒誓，
毋拘𪜶咒的誓是假的。 |
| 5:3 | 上主，你豈毋是啲尋真誠的人？
此個城的人你拍𪜶，𪜶毋知疼； 你毀滅𪜶，𪜶毋肯受教； 𪜶固執硬心，毋肯回頭。 |
| 5:4 | 我想：𪜶是散赤、無知的人民；
𪜶毋識上主的道路， 毋知上帝的命令。 |
| 5:5 | 我就去尋有權勢的人，及𪜶談論。
𪜶應該識上主的道路， 知𪜶的上帝的命令。 哪會知，𪜶竟然摃斷軛， 解開索，無欲順服上主。 |
| 5:6 | 所以，樹林的獅會來給𪜶吞食，
野外的豺狼會來咬死𪜶， 城外的豹啲當等𪜶。 若有人出城，一定受拆碎， 因為𪜶不時違背上主， 對上主不忠的事算𣍐了。 |
| 5:7 | 上主講：「我哪著赦免恁？
恁的子兒放拺我， 閣指假神咒誓。 我互𪜶飽足， 𪜶煞去行淫， 歸陣去揢佇妓女的厝。 |
| 5:8 | 𪜶親像飼飽起𪁎的馬，
向厝邊的某呼噓仔。 |
| 5:9 | 𪜶做諸個事，我豈毋免辦？
親像此款國家，我豈毋免報復？ 上主按呢宣告。 |
| 5:10 | 恁著去毀壞伊的葡萄園，
毋拘毋通給𪜶毀了了， 干焦剉伊的枝， 因為𪜶無屬佇上主。 |
| 5:11 | 以色列家及猶大家完全背叛我。」
上主按呢宣告。 |
| 5:12 | 上主放拺以色列 以色列毋承認上主所講的話，講：「上主𣍐做什麼，𣍐降災禍，𣍐互咱抵著戰亂抑是飢荒。 |
| 5:13 | 先知的教示不過親像一陣風，上主的話無佇𪜶內面。」所以上主 — 萬軍的統帥上帝對我講：「𪜶既然按呢講，我欲互我囥佇你嘴內的話成做火，互諸個人民成做柴，火欲給𪜶燒掉。」 |
| 5:14 | 併於上節 |
| 5:15 | 上主講：「以色列人，我欲互一個國家對真遠的所在來攻擊你。此個國家真強，歷史悠久；𪜶的語言恁毋識，𪜶講什麼恁聽無。 |
| 5:16 | 𪜶攏是勇猛的戰士；𪜶的箭袋親像拍開的墓，會當射死真多人。 |
| 5:17 | 𪜶欲給恁的五穀及米糧食了了，吞滅恁的後生查某子，閣吞食恁的牛群羊群，將恁的葡萄及無花果食甲攏無賰，閣用刀劍毀壞恁所倚靠堅固的城。」 |
| 5:18 | 上主講：「就是到彼時，我嘛𣍐給我的子民徹底毀滅。 |
| 5:19 | 𪜶若問：『上主 — 阮的上帝是按怎給阮做諸個代誌？』你著給𪜶講：『既然恁放拺我，佇恁家己的土地服事別個神明，恁嘛欲親像按呢，佇毋是屬恁的地服事外族人。』」 |
| 5:20 | 上主警告伊的子民 著給雅各的後代傳報，給猶大的人民宣布： |
| 5:21 | 恁此個戇閣無知的人民，著注意聽！恁有目睭毋拘看無，有耳孔毋拘聽無。 |
| 5:22 | 上主講：「恁毋驚我是無？佇我的面前𣍐驚惶愕愕惙是無？我用沙給海設永遠的界限，互海𣍐當超過；海湧撥來撥去淐高，嘛𣍐當𨃟過。 |
| 5:23 | 毋拘此個人民固執，忤逆，背叛我，離開我。 |
| 5:24 | 𪜶心內攏無想：『咱著敬畏上主 — 咱的上帝，伊照時賜春霖秋雨互咱，閣給咱定收成的季節。』 |
| 5:25 | 恁的罪過煞互風雨失調；恁的罪孽互恁𣍐當得著福氣。 |
| 5:26 | 「我的子民中間有歹人；𪜶親像掠鳥的人埋伏當等，設活罩欲掠人。 |
| 5:27 | 𪜶歸厝間攏是詭詐，親像鳥籠仔內攏是鳥，所以𪜶好額閣有勢。 |
| 5:28 | 𪜶紅膏赤蠘，做盡歹代。𪜶無替孤兒申冤，嘛無替散赤人主持公道。」 |
| 5:29 | 上主閣講：「𪜶做諸個事，我豈毋免給𪜶辦？親像此款國家，我豈毋免給𪜶報復？ |
| 5:30 | 恐怖驚惶的事竟然佇此個國家發生： |
| 5:31 | 先知講假信息，祭司搙權，我的子民嘛意愛按呢。審判到的時，看恁欲按怎？」 |