| 章節 | 現代台語漢字2021版經文 |
| 65:1 | 上帝的審判公正 上主講： 無追求我的，我欲互𪜶尋著。 無尋我的，我欲互𪜶抵著。 我對無求叫我的名的國家講： 「我佇遮，我佇遮！」 |
| 65:2 | 我歸日伸手聽候背逆的子民；
𪜶照家己的邪念行歹路。 |
| 65:3 | 諸個人民當我的面一直惹我受氣，
佇園內對偶像獻祭， 佇壇頂給神明燒香。 |
| 65:4 | 𪜶用墓壙孔做眠床，
佇石洞內過暝。 𪜶食豬肉， 歸鼎攏是無清氣的物煮的湯。 |
| 65:5 | 𪜶講：「閃開，毋通倚來！
我神聖，𣍐磕得。」 諸個人互我鼻孔淐煙， 歸日歸腹肚火。 |
| 65:6 | 看咧，諸個我攏已經寫起來；
我一定𣍐恬恬，我欲報應， 徹底給𪜶報應； |
| 65:7 | 因為𪜶及𪜶的列祖犯仝款的罪，
佇山頂燒香， 佇山崙仔褻瀆我。 我欲照𪜶應得的給𪜶報應， 照𪜶的行為刑罰𪜶。 上主按呢宣告。 |
| 65:8 | 上主按呢講：
人尋著歸葩葡萄會當做新酒， 伊會講：「毋通給伊毀壞， 因為內面有祝福。」 所以，為著我的僕人的緣故， 我𣍐給𪜶全部消滅。 |
| 65:9 | 我欲互雅各有後代，
對猶大出子孫繼承我的眾山； 我揀選的子民會承接此塊土地， 我的僕人會佇遐徛起。 |
| 65:10 | 沙崙平原會變做羊群的牧場，
亞割山谷變做牛群歇睏的所在。 諸個攏欲賜互尋求我的子民。 |
| 65:11 | 毋拘，恁諸個放拺上主的人，
恁𣍐記得我的聖山錫安， 為著「好運的神」辦桌， 閣為著「命運的神」倒滿調和的酒。 |
| 65:12 | 我一定欲互恁死佇刀下，
互恁跪啲受刣死； 因為我叫，恁毋應， 我講，恁毋聽。 恁顛倒做我看做歹的代誌， 意愛我無愛的事。 |
| 65:13 | 所以，至高的上主按呢講：
我的僕人一定有通食， 毋拘恁會枵餓； 我的僕人有通飲， 毋拘恁會嘴焦； 我的僕人會歡喜， 毋拘恁會見笑； |
| 65:14 | 我的僕人會歡喜唱歌，
毋拘恁會憂傷哀哭， 因為心神憂苦大聲哮。 |
| 65:15 | 恁的名會留啲，互我的選民用來咒詛。
至高的上主會給恁消滅， 毋拘會互伊的僕人另外一個名。 |
| 65:16 | 按呢，所有佇此個地為家己求福氣的人，
會對信實的上帝得著福氣； 所有佇此個地咒誓的人， 會指信實的上帝咒誓； 因為早前的患難會互人𣍐記得， 會對我的目睭前消失。 |
| 65:17 | 榮光的新天新地 上主講： 恁看，我欲創造新的天，新的地； 過去的代誌人𣍐閣記得，𣍐閣懷念。 |
| 65:18 | 恁著因為我啲創造的一切永遠歡喜快樂，
為著我欲創造的耶路撒冷充滿歡喜， 為著城內的住民充滿快樂。 |
| 65:19 | 我因為耶路撒冷來歡喜，
欲因為我的子民來快樂。 城內𣍐閣聽著啼哭的聲， 嘛𣍐閣聽見哀哭的聲。 |
| 65:20 | 佇遐𣍐閣有干焦活幾日仔的嬰仔，
嘛𣍐有歲壽未滿就死的老人。 食一百歲死去的，人嘛想講伊猶少年； 食無夠一百歲的，人會想講伊是受咒詛。 |
| 65:21 | 𪜶會起厝，家己住佇內面；
𪜶會栽種葡萄園，食園裡的果子。 |
| 65:22 | 𪜶起厝，𣍐互別人佔去住；
𪜶栽種，𣍐互別人搶去食。 樹活偌久，我的子民嘛會活赫久； 我的選民會久長享受勞苦得來的成果。 |
| 65:23 | 𪜶的勞碌𣍐落空，
𪜶生的子兒𣍐抵著災難； 因為𪜶是上主賜福的人的子孫， 𪜶的後代嘛是按呢。 |
| 65:24 | 𪜶猶未求叫，我就應允；
𪜶猶啲講，我就應答。 |
| 65:25 | 豺狼及羊羔會做夥食，
獅會親像牛食草； 蛇的食物猶久是土粉！ 佇我聖山的逐所在， 一定無有傷害，嘛無破壞。 上主按呢宣布。 |