| 章節 | 現代台語漢字2021版經文 |
| 60:1 | 耶路撒冷將來的榮耀 起來！發光！你的光已經來到！ 上主的榮光已經啲照你！ |
| 60:2 | 看咧，雖然烏暗罩滿大地，
大烏暗遮蓋萬民， 毋拘上主會給你照光， 伊的榮光會佇你身上顯明。 |
| 60:3 | 萬國會來就近你的光，
列王來親近你發出的光輝。 |
| 60:4 | 著攑頭四方觀看：
你的子民聚集來到你遮； 你的子對遠遠轉來， 你的查某子若囝仔互人抱來。 |
| 60:5 | 彼時你看著諸個，就真光彩；
心激動真歡喜。 對海運來的財富會摒互你； 萬國的財寶攏變你的。 |
| 60:6 | 歸大陣的駱駝，米甸及以法的單峰駱駝攏會來，
對示巴來的嘛會帶黃金及乳香； 𪜶攏會頌讚宣揚上主。 |
| 60:7 | 所有基達的羊群攏會聚集去你遐，
所有尼拜約的綿羊會做你的路用； 諸個攏會獻佇祭壇， 成做我歡喜接納的祭物。 我上主會互我的殿的榮耀閣較輝煌。 |
| 60:8 | 許個親像歸片雲飛來，
親像粉鳥飛轉來巢裡的是啥人？ |
| 60:9 | 𪜶是對遠遠的海島聚集的船隊；
他施的船做頭， 導你的子兒對真遠的所在帶金帶銀來， 攏是為著上主 — 你的上帝，以色列神聖的上帝的名。 因為伊已經有互你得著榮耀。 |
| 60:10 | 上主對耶路撒冷講：
「外國人會重建你的城牆， 𪜶的君王會服事你。 我曾佇受氣中刑罰你， 毋拘今欲施恩憐憫你。 |
| 60:11 | 你的城門攏會不時開開，
日時暝時門攏𣍐關； 按呢，列邦會帶𪜶的財物來， 𪜶的君王導隊，排列進貢。 |
| 60:12 | 毋肯服事你的列邦及王國攏會滅亡；
許個邦國攏會徹底荒廢。 |
| 60:13 | 「黎巴嫩的榮光，
就是松樹、杉樹、黃楊樹， 攏會運來耶路撒冷， 裝飾美化我的聖所； 我嘛欲互我腳踏的所在得著榮光。 |
| 60:14 | 壓迫你許個人的後代
攏會來行禮表敬意； 所有藐視你的人會來佇你的腳下跪拜。 𪜶欲稱你做『上主的城』， 『以色列神聖的上帝的錫安』。 |
| 60:15 | 「雖然你曾受棄拺，受厭惡，
無人對你遐經過， 我欲互你有永遠的榮華， 有世世代代的歡喜！ |
| 60:16 | 你欲𠲿列國的奶，
欲飲君王的奶； 你就知我上主是你的救主， 你的救贖主，以色列的大能者。 |
| 60:17 | 「我欲提金代替銅，
提銀代替鐵； 欲用銅代替柴， 用鐵代替石頭。 我欲設立和平做你的官長， 指派公義做你的監督。 |
| 60:18 | 佇你的土地𣍐閣聽見強暴，
你的境內𣍐閣有毀滅荒廢。 你欲稱你的牆做『拯救』， 叫你的門做『讚美』。 |
| 60:19 | 「日時你無閣需要日頭的光，
暗時嘛無需要月娘的光照； 因為我上主欲做你永遠的光； 你的上帝是你的榮光。 |
| 60:20 | 你的日頭𣍐閣落山，
你的月娘𣍐匿起來。 上主欲做你永遠的光； 你悲傷的日子會煞。 |
| 60:21 | 你的人民攏會秉公行義；
𪜶會永遠繼承應允的土地。 𪜶是我親手所種所造， 互我通得著榮光。 |
| 60:22 | 上細的會變做大宗族；
上弱的會變做強國。 我是上主， 佇時機成熟的時我會真緊促成此個事。」 |