| 章節 | 現代台語漢字2021版經文 |
| 58:1 | 真實的敬拜 著大聲喝！毋通停止。 著出力喝！親像啲歕哨角。 著對我的子民宣布𪜶的背逆！ 對雅各的後代宣告𪜶的罪！ |
| 58:2 | 𪜶逐日啲尋求我，
意愛欲知我的道路， 若親像是秉公行義的國民， 無棄拺𪜶的上帝的命令。 𪜶有對我求問公義的審判， 若親像歡喜親近上帝。 |
| 58:3 | 毋拘𪜶問：「阮禁食，你哪無關心？
阮刻苦，你哪無注意？」 其實，恁佇禁食的日， 猶為著家己的利益， 強迫恁的工人做苦工。 |
| 58:4 | 恁禁食，嘛啲冤家爭鬥，
用兇猛的拳頭母掙別人。 恁今仔日按呢啲禁食， 豈會互恁祈禱的聲透到天頂？ |
| 58:5 | 這豈是我所愛的禁食？
人刻苦家己的日子豈是按呢？ 恁親像蘆葦頭俯俯， 穿麻衫倒佇火灰， 豈講這就是禁食， 是上主歡喜接納的日？ |
| 58:6 | 其實，我所愛的禁食是按呢：
解開無公正的鎖鍊； 剪斷縛重擔的索； 解放受壓迫的得自由； 摃斷一切的軛。 |
| 58:7 | 我所愛的豈毋是恁及枵餓的分享食物，
接待無家可歸的散赤人去恁兜， 互赤身露體的有衫通幔， 無閃避對親人的責任？ |
| 58:8 | 按呢，恁的光會親像黎明發出的光，
恁會真緊得著醫治， 恁的公義會做先鋒導恁， 上主的榮光會佇後面保護恁。 |
| 58:9 | 彼時，恁求叫，上主一定應答；
恁對伊求幫贊，伊會講：我佇遮。 恁若將欺壓人的軛徙開， 將指責人的指頭仔徙走， 無閣講人的歹話； |
| 58:10 | 恁若將食物分互枵餓的人，
滿足困苦的人的需要； 按呢，恁的光會佇烏暗中發出， 暗暝會親像日中晝。 |
| 58:11 | 上主會繼續引導恁，
互恁佇曠旱的所在逐項攏滿足， 互恁的骨頭勇壯。 恁會親像有水灌沃的園， 親像有水直直流的水泉。 |
| 58:12 | 恁會重建早就荒廢的所在，
修建古早就有的地基。 恁會互人稱做「補破隙的」， 互人叫做「修理厝互人徛起的」。 |
| 58:13 | 守安歇日的報賞 恁若無破壞安歇日， 無佇聖的日子追求利益家己的事； 恁若看安歇日做通歡喜的日， 尊重伊做上主的聖日； 恁若尊重聖日，無做日常的工作， 無做家己歡喜的事，無濫糝講話； |
| 58:14 | 按呢，恁就會對上主得著喜樂。
我欲互恁佇地上逐所在受尊重， 用恁祖先雅各留互恁的產業養飼恁。 上主親嘴按呢宣布。 |