| 章節 | 現代台語漢字2021版經文 |
| 54:1 | 永遠和平的約 耶路撒冷，你此個𣍐懷孕，無生子的婦仁人啊， 著唱歌！ 你此個毋曾經驗催陣艱苦的婦仁人啊， 著出大聲歡喜唱歌！ 因為受棄拺的婦仁人會有真多子兒， 比有丈夫的較多。 上主按呢宣布。 |
| 54:2 | 著擴展你住的布棚的地。
著給你布棚的布扭互開，毋通限制； 索著牽甲盡磅； 杙仔攏釘互牢。 |
| 54:3 | 因為你會四面擴展領土，
你的後代會得著列國的土地； 荒廢的城鎮會有真多人住。 |
| 54:4 | 毋免驚！你𣍐閣再見笑；
你免閣忍受侮辱。 著𣍐記得你少年的時的見笑； 毋通閣記牢你做寡婦的恥辱。 |
| 54:5 | 因為創造你的是你的丈夫；
伊的稱呼是上主 — 萬軍的統帥。 以色列神聖的上帝是你的救贖主； 伊受稱呼做全地的上帝。 |
| 54:6 | 以色列啊，你以前是少年的婦仁人，
互上主 — 你的丈夫棄拺，心憂傷。 毋拘伊叫你倒轉去伊遐，講： |
| 54:7 | 雖然我有暫時棄拺你，
我欲用深深的疼接你轉來。 |
| 54:8 | 我曾對你發極大的受氣，離開你一時仔久，
今，我欲用不變的疼憐憫你。 上主 — 你的救贖主按呢宣布。 |
| 54:9 | 這，對我來講，若親像挪亞的日：
我立誓𣍐閣互大水淹密大地。 今，我嘛立誓𣍐閣對你受氣， 𣍐閣責備你。 |
| 54:10 | 大山會當徙開，小山會當遷移；
毋拘我不變的疼永遠𣍐離開你； 我會永遠遵守和平的約。 憐憫你的上主按呢宣布。 |
| 54:11 | 耶路撒冷的將來 上主講： 耶路撒冷，你此個受苦的城啊， 你互暴風掃走，無人給你安慰。 我欲用彩色的石給你重建， 用藍寶石做你的地基。 |
| 54:12 | 我欲用紅寶石給你起城塔，
用會發光的寶石造你的城門， 用珠寶造你四圍的城牆。 |
| 54:13 | 你的子兒攏會受上主教導；
你的子孫攏會平安繁榮。 |
| 54:14 | 你會因為秉公行義得著堅立。
你無什麼通驚惶，因為𣍐閣受壓迫； 兇暴會離開你遠遠， 恐怖𣍐逼近你。 |
| 54:15 | 若有人攻擊你，毋是我引起的。
所有攻擊你的，會互你拍敗。 |
| 54:16 | 你看，我造拍鐵師傅，
𪜶歕火炭互火焰，製造武器。 我嘛造毀滅者， 𪜶起來施行剿滅。 |
| 54:17 | 所有為著欲攻擊你製造的武器，無一項有路用。
每一個佇法庭控告你的人，一定𣍐勝訴。 這是上主的僕人應得的產業； 我欲維護伊，互伊勝利。 上主按呢宣布。 |