| 章節 | 現代台語漢字2021版經文 |
| 47:1 | 巴比倫受審判 在室女巴比倫啊， 落來坐𫢶土粉！ 少女迦勒底啊， 對寶座落來，坐𫢶土腳！ 無人會閣講你溫柔抑是幼秀。 |
| 47:2 | 去挨石磨，磨麵粉！
面帕提掉！ 裙摠起來， 露出大腿蹽過溪！ |
| 47:3 | 人會看著你赤身露體；
你的見笑會露現。 我欲報復， 一個都𣍐放伊煞。 |
| 47:4 | 阮的救贖主是以色列神聖的上帝；
伊的稱呼是上主 — 萬軍的統帥。 |
| 47:5 | 少女迦勒底啊，
入去烏暗的所在恬恬仔坐； 你𣍐閣再互人稱做 「列國的女王」。 |
| 47:6 | 我有對我的子民發受氣，
互家己的產業受凌辱， 給𪜶交佇你的手中。 你無對𪜶施憐憫， 甚至用真重的軛互老人揹。 |
| 47:7 | 你曾講「我欲永遠做女王」，
所以無給諸個代誌囥佇心內， 嘛無考慮代誌的結局。 |
| 47:8 | 今，你此個愛宴樂，安穩坐佇寶座頂的人，
著注意聽！ 你家己心內想講： 只有我，我以外無別個； 我絕對𣍐變做寡婦， 𣍐經驗喪失子兒的苦痛。 |
| 47:9 | 毋拘，佇一日內，一目𥍉久，
此兩項代誌攏會發生佇你身上， 死子及守寡做一下到！ 無論你行偌多邪術， 唸偌多符咒都無採工。 |
| 47:10 | 你自信做歹無代誌，
講：無人會看著。 你互家己的智慧聰明導入偏路， 家己心內想講： 我及上帝平大， 無人會當及我比。 |
| 47:11 | 毋拘災禍會趇著你，
你毋知著按怎才會當給伊趕走。 災害會降落佇你身上， 你無法度給伊除掉。 佇你毋知的時， 毀滅會忽然臨到你！ |
| 47:12 | 起來，做你去唸你的符咒，行較多邪術；
你對少年的時就拍拼做諸個事。 按呢，你可能會成功， 會互敵人驚甲欲死。 |
| 47:13 | 你因為人互你的計策傷多煞厭倦；
去叫許個觀天象的、看星辰的出來救你； 𪜶會佇初一十五預言將來的事。 |
| 47:14 | 看咧，𪜶會親像麥稿互火燒毀；
𪜶𣍐當救家己脫離火焰的威力， 彼款火毋是會當坐佇邊仔烘燒的勻勻仔火。 |
| 47:15 | 對少年就及你勾結，鬥陣拍拼的人，
帶來互你的，最後攏是按呢。 𪜶攏會佇家己揀的路失迷， 無人會當救你。 |