| 章節 | 現代台語漢字2021版經文 |
| 44:1 | 上主是唯一的上帝 上主講： 雅各 — 我的僕人，今著聽； 我所揀選的以色列，聽咧！ |
| 44:2 | 捏造你，對母胎就塑造你，
欲幫贊你彼位上主按呢講： 我的僕人以色列，毋免驚！ 你是我所疼，所揀選的。 |
| 44:3 | 我欲摒落水互嘴焦的地；
我欲互焦燥的地有溪水啲流。 我欲將我的神摒互你的後代， 欲賜福氣互你的子孫。 |
| 44:4 | 𪜶會親像草佇水充足的所在大欉，
親像柳樹佇水直直流的溪邊生長。 |
| 44:5 | 有人會講「我屬上主」；
另外一個給家己號名叫雅各； 閣一個佇手的頂面寫「上主的」， 自稱做以色列。 |
| 44:6 | 上主 — 統治以色列的救贖主，
上主 — 萬軍的統帥按呢講： 我是開始，我是結束； 我以外無上帝。 |
| 44:7 | 啥人會當及我比？著出來講！
我曾對古早的子民預告欲發生的代誌， 伊嘛通按呢宣告將來的事。 |
| 44:8 | 恁毋免驚，嘛毋免惙！
我豈無早就對恁宣告？ 恁是我的見證人。 我以外豈有上帝， 豈有互恁通閃匿的石磐？ 我知，連一個都無。 |
| 44:9 | 偶像無路用 所有製造偶像的人攏無路用；𪜶所合意的攏無利益。拜偶像的人攏睛瞑、無知；𪜶攏會失敗見笑。 |
| 44:10 | 啥人製造神明，鑄造無路用的偶像？ |
| 44:11 | 你看，伊的同伴攏會見笑；師傅不過是人。互𪜶攏聚集倚來，準備上法庭；𪜶會驚惶，攏會見笑。 |
| 44:12 | 拍鐵師傅給鐵囥佇火炭內炰互紅，用勇的手骨夯摃槌拍出形體。伊若枵，就無力；嘴焦無飲水，就厭倦。 |
| 44:13 | 木匠用繩線量，用粉筆畫線，用各種器具雕刻，用圓尺畫模，照人的款式做媠的人形造偶像，給伊𫞼佇廟內。 |
| 44:14 | 伊剉柏香樹；閣揀青桐樹及橡樹互𪜶佇樹林內成長；伊栽種松樹，聽候雨水潤澤互伊大欉。 |
| 44:15 | 然後，樹剉起來做火柴；有的提來互厝內較燒烙，有的點𤏸通烘餅止飢。閣一寡做神像給跪給拜。 |
| 44:16 | 一半的柴，伊起火烘肉來食，食甲滿足。伊嘛家己那烘那講：「讚！我看火啲𤏸，感覺真燒烙。」 |
| 44:17 | 伊用所賰的柴做一個神明，做偶像，跪落去給拜，對伊祈禱講：「你是我的神明，救我！」 |
| 44:18 | 此款人毋識閣𣍐理解，因為上主給𪜶的目睭糊啲，互𪜶看𣍐著，心智塞啲，𣍐曉想。 |
| 44:19 | 𪜶攏無啲想，無智識無聰明通講：「一半的柴，我用做火炭烘餅，嘛烘肉來食。所賰的柴我豈通用來造一個偶像？我豈通跪落去拜一塊柴頭？」 |
| 44:20 | 𪜶用火灰準飯食，戇甲互人拐去，無法度救家己。𪜶毋承認手裡捧的偶像根本毋是神明。 |
| 44:21 | 上主 — 創造主及救贖主 上主按呢講： 雅各啊，著會記得諸個代誌； 以色列啊，你是我的僕人。 我塑造你，你是我的僕人； 以色列啊，我一定𣍐給你𣍐記得。 |
| 44:22 | 我已經給你的罪過掃除，親像給密雲吹散；
擦消你的罪惡，親像互薄霧消散。 著歸向我，因為我有救贖你。 |
| 44:23 | 諸個天啊，著歡喜唱歌，
因為上主有做此項代誌！ 地的深坑啊，著大聲喝！ 大山小山啊，著出聲唱歌！ 樹林及內面所有的樹啊，著唱！ 因為上主有救贖雅各， 伊欲通過以色列顯示伊的榮耀！ |
| 44:24 | 互你佇母胎成形，救贖你的上主按呢宣布：
我是上主，是萬物的創造主。 我搋開天的時，單獨一個； 我鋪地的時，只有我家己一個。 |
| 44:25 | 我互假先知的兆頭混亂，
互卜卦的人預測失效。 我互有智慧的人見笑退後， 有智識的人變愚戇。 |
| 44:26 | 我互我僕人的話得著證實，
互我使者的計劃實現。 關係耶路撒冷，我講：欲有人佇遐徛起； 關係猶大的城市，我講：我欲給𪜶起造； 已經變荒埔的所在，我給𪜶重建。 |
| 44:27 | 我對深淵講：著焦去！
我欲互你的河流攏焦焦去。 |
| 44:28 | 我對塞魯士講：你著替我牧養；
你著完成我的旨意。 伊會下令重建耶路撒冷， 重新下聖殿的地基。 |