| 章節 | 現代台語漢字2021版經文 |
| 42:1 | 上主的僕人 上主講： 「看咧，我所扶持的僕人， 伊是我所揀選，心所意愛的！ 我有將我的神賜互伊； 伊會佇萬邦施行公義。 |
| 42:2 | 伊𣍐出聲喝，𣍐大聲嚷；
伊𣍐佇街頭巷尾喝互人聽見。 |
| 42:3 | 受傷的蘆葦，伊𣍐遏斷；
欲化的燈火，伊𣍐歕熄。 伊會確實施行公義。 |
| 42:4 | 伊𣍐灰心，嘛𣍐失志，
一直到公義佇地上確立。 眾海島攏仰望伊的教導。」 |
| 42:5 | 上帝創造天，給天搋開；
伊造地及地上的萬物， 將氣賜互世間人， 賜性命互佇地上啲生活的人。 此位上主 — 咱的上帝按呢講： |
| 42:6 | 「我上主召你來實踐公義；
我有牽你的手保守你。 通過你，我及萬民定契約， 欲互你做萬國的光。 |
| 42:7 | 你欲開失明的人的目睭，
互受關的出監獄， 互坐佇烏暗地牢中的得自由。 |
| 42:8 | 我是上主，這是我的稱呼。
我𣍐將我的榮耀讓互別個神明， 𣍐將我的稱讚歸互偶像。 |
| 42:9 | 看咧，早前的事已經實現；
現在我對恁宣布新的事， 佇猶未發生以前先講互恁聽。」 |
| 42:10 | 頌讚的詩 海及海中一切的生物， 海島及島內的住民啊， 著對上主唱新的歌， 對天邊海角稱讚伊。 |
| 42:11 | 荒野及內面的城鎮，著出大聲；
基達人的庄社，著歡呼。 西拉的住民，著歡喜唱歌， 對山頂大聲喝。 |
| 42:12 | 𪜶著將榮光歸互上主，
佇眾海島宣揚稱讚伊。 |
| 42:13 | 上主會親像戰士出征，
親像勇士激發鬥志。 伊會出聲喝，大聲叫， 勇猛攻擊伊的對敵。 |
| 42:14 | 上帝應允幫贊伊的子民 上帝講：「我已經忍真久， 一直恬恬無出聲。 今我欲採取行動， 親像產婦哀哀叫， 直直喘，喘𣍐離。 |
| 42:15 | 我欲互大山小山攏荒廢，
互所有的花草焦了了。 我欲互江河變做焦地， 互湖水攏焦去。 |
| 42:16 | 我欲導失明的人行路，
行𪜶毋曾行過的路。 我欲互烏暗佇𪜶面前變做光明， 互彎曲的路變做直直。 諸個事我攏欲做，絕對𣍐放棄。 |
| 42:17 | 倚靠雕刻的偶像的，
對鑄造的像講『恁是阮的神』的人， 此款人一定失敗受大恥辱。」 |
| 42:18 | 以色列無受教 恁諸個臭耳的，著聽！ 恁諸個睛瞑的，著看！ |
| 42:19 | 啥人比我的僕人閣較睛瞑？
啥人比我差的使者閣較臭耳？ |
| 42:20 | 以色列啊，你看真多，毋拘𣍐明白；
你耳仔拍真開，毋拘𣍐領悟。 |
| 42:21 | 上主意愛秉公行義，
將家己的教導發揚光大。 |
| 42:22 | 毋拘諸個受搶劫剝奪的子民，
攏關佇地穴，禁佇監獄。 𪜶互人做獵物扛走，無人解救； 𪜶互人劫去，無人要求放𪜶。 |
| 42:23 | 恁中間有啥人會關心此個代誌？
對現在起有啥人會注意此項事？ |
| 42:24 | 啥人將雅各交互人做獵物，
互以色列出在人搶劫？ 是𪜶所得罪彼位上主本身！ 𪜶毋肯行伊的道路， 毋肯遵守伊的律法。 |
| 42:25 | 所以，伊將猛烈的受氣，戰爭的暴力
攏摒佇以色列身上。 𪜶互烈火包圍，毋拘攏無要無緊， 互火燒著，嘛猶皮皮。 |