| 章節 | 現代台語漢字2021版經文 |
| 37:1 | 國王請問以賽亞 ( 王下 19:1-7 ) 希西家王一下聽著𪜶的報告，就拆裂伊的衫，穿麻衫，入去上主的殿。 |
| 37:2 | 伊派宮廷總管以利亞敬、書記舍伯那，及資深的祭司，攏穿麻衫去見亞摩斯的子先知以賽亞。 |
| 37:3 | 𪜶給以賽亞講：「希西家按呢講：『今仔日是患難的日，是受責罰凌辱的日，親像有囝仔欲出世，毋拘無力給生出來。 |
| 37:4 | 亞述王有派伊的部下總司令來褻瀆永活的上帝，豈採上主 — 你的上帝有聽著，會處罰講諸個話的人。所以，著替留佇遮的人祈禱。』」 |
| 37:5 | 希西家王的大臣來見以賽亞的時， |
| 37:6 | 以賽亞對𪜶講：「恁著按呢給恁的主人講：『上主按呢講：毋通因為恁所聽著亞述王的部下對我的誹謗來驚惶。 |
| 37:7 | 看咧，我欲擾亂伊的心，互伊聽著風聲，倒轉去家己的國家；我欲互伊佇遐互人刣死。』」 |
| 37:8 | 亞述王閣來恐嚇 ( 王下 19:8-19 ) 總司令聽著亞述王已經離開拉吉去攻擊立拿，就出發去立拿及王會合。 |
| 37:9 | 亞述王聽見衣索匹亞王特哈加欲來攻擊𪜶，就派使者去見希西家，吩咐𪜶 |
| 37:10 | 對猶大王希西家講：「毋通互恁所倚靠的上帝騙去，講：耶路撒冷𣍐陷落佇亞述王的手頭。 |
| 37:11 | 恁一定有聽著亞述諸王對列國所做的代誌；𪜶給列國攏剿滅。恁豈有法度避免？ |
| 37:12 | 我的祖先毀滅的國家，歌散、哈蘭、利色，以及住佇提拉撒的伯‧伊甸人，𪜶的神明豈有解救𪜶？ |
| 37:13 | 哈馬的王、亞珥拔的王、西法瓦音城的王、希拿及以瓦的王佇叨位？」 |
| 37:14 | 希西家對使者的手接著批，讀了後，就上去上主的聖殿，佇上主的面前將批搋開。 |
| 37:15 | 希西家向上主祈禱講： |
| 37:16 | 「坐佇天使基路伯頂面的上主 — 萬軍的統帥、以色列的上帝啊，只有你是地上萬國的上帝。你創造天及地。 |
| 37:17 | 上主啊，求你俯耳孔聽，開你的目睭看。求你聽西拿基立差使者來講一切褻瀆你活活上帝的話。 |
| 37:18 | 上主啊，亞述諸王確實有互列國及𪜶的土地攏荒廢， |
| 37:19 | 給𪜶的神明攏㧒互火燒滅，其實許個毋是神，不過是人的手用柴用石造的。 |
| 37:20 | 今，上主 — 阮的上帝啊，求你救阮脫離伊的手，互地上萬國攏會知只有你是上主。」 |
| 37:21 | 以賽亞互王的信息 ( 王下 19:20-37 ) 亞摩斯的子以賽亞差人去見希西家，講：「上主 — 以色列的上帝按呢講：『你因為亞述王西拿基立的事對我祈禱。 |
| 37:22 | 關係西拿基立，我上主按呢講：
在室女錫安看輕你，恥笑你； 少女耶路撒冷對你搖頭。 |
| 37:23 | 你啲侮辱啥人，褻瀆啥人？
你啲對啥人大聲？ 你啲對啥人驕傲，給伊看毋上目？ 其實你是啲無視我以色列神聖的上帝！ |
| 37:24 | 你有通過你的僕人侮慢主。
你講：我駛真多戰車𬦰上高山， 去到黎巴嫩上高的山尖。 我佇遐剉上高的柏香樹， 剉上好的松樹。 我𬦰到上高的山尖， 進入上茂盛的樹林。 |
| 37:25 | 我挖井，飲𪜶的水。
我嘛用腳蹋埃及所有的河流， 蹋甲河流攏焦去。 |
| 37:26 | 「『恁豈毋曾聽見？
真早我做此個計劃， 古早就決定， 今已經實現， 就是你互堅固的城堡攏倒壞， 變做荒埔石堆。 |
| 37:27 | 遐的住民攏無力；
𪜶驚惶，見笑。 𪜶親像野地的草， 幼軟的芛，厝尾頂的草， 東風吹來就焦去。 |
| 37:28 | 「『你住叨位，你出，你入，
你對我的受氣，我攏知。 |
| 37:29 | 因為你有對我發受氣，
我有聽著你自高的話； 我欲用鉤仔鉤你的鼻， 用馬咬韁掛佇你的嘴， 互你對來彼條路倒轉去。』 |
| 37:30 | 「希西家，這欲互你做記號：今年，明年，恁攏會食野生的物；第三年，恁會撒種，收成，栽種葡萄，食所結的果子。 |
| 37:31 | 猶大家逃脫所賰的子民會親像植物，下面釘根，頂面結果子。 |
| 37:32 | 對耶路撒冷欲有賰落來的子民出來，對錫安山欲有人逃脫出來。上主 — 萬軍的統帥的熱誠一定會成全此個事。 |
| 37:33 | 「所以，關係亞述王，上主有按呢講：『伊𣍐進入此個城，連一支箭嘛𣍐射入來。伊𣍐夯盾牌倚近城，嘛𣍐起土堆攻城。 |
| 37:34 | 伊對叨一條路來，嘛會對彼條路轉去；伊𣍐進入此個城。上主按呢講。 |
| 37:35 | 我為著我的緣故，嘛為著我的僕人大闢的緣故，欲保護解救此個城。』」 |
| 37:36 | 上主的天使去亞述軍營，刣死十八萬五千個人。隔早起，人起來，發見逐所在攏是身屍。 |
| 37:37 | 亞述王西拿基立就撤營，倒轉去尼尼微，住佇遐。 |
| 37:38 | 有一日，伊佇尼斯洛的廟啲拜伊的神明的時，伊的子亞得米勒及沙利色用刀給伊刣死，然後逃走去亞拉臘的地；伊另外一個子以撒‧哈頓繼承伊作王。 |