| 章節 | 現代台語漢字2021版經文 |
| 33:1 | 求幫贊的祈禱 慘啊，你此個猶未受毀滅的毀滅者， 你此個毋曾受背叛的背叛者！ 你毀滅人了後，你嘛會受毀滅； 你背叛人了後，你嘛會受背叛。 |
| 33:2 | 上主啊，憐憫阮；阮啲聽候你。
求你逐早起做阮的氣力， 佇阮抵著患難的時做阮的拯救。 |
| 33:3 | 你一下喝聲，萬民攏逃走；
你一下展威，萬國攏四散。 |
| 33:4 | 人會來收拾戰利品，若準草蜢公集倚來；
親像草蜢爭倚去，人會按呢相爭搶。 |
| 33:5 | 上主受尊做大，伊住佇極高的所在；
伊欲將公平正義充滿錫安。 |
| 33:6 | 伊欲互你一生一世安穩，
有豐盛的救恩、智慧，及智識； 敬畏上主是你的至寶。 |
| 33:7 | 恁看，勇士佇街路啲哀叫；
求和的差使哀慘啼哭。 |
| 33:8 | 大路青凊，無人啲行。
契約破裂，證人受看輕； 人無受尊重。 |
| 33:9 | 大地哀傷衰敗；
黎巴嫩見笑枯焦； 沙崙變做親像曠野； 巴珊及迦密的樹葉落了了。 |
| 33:10 | 上主警告伊的敵人 上主按呢講： 「此陣我欲徛起來， 欲高舉家己， 顯明我的大氣力。 |
| 33:11 | 恁懷孕的是粗糠，生產的是麥稿；
我的氣欲若火吞滅恁。 |
| 33:12 | 萬民會互火燒甲變做石灰，
親像斬起來的莿互火燒滅。 |
| 33:13 | 恁佇遠遠的人，著聽我所做的事；
恁佇近近的人，著承認我的大能。」 |
| 33:14 | 錫安的罪人攏驚惶；
無敬虔的人皮皮惙； 𪜶講：「咱豈有人會當及吞滅的火徛起？ 豈有人會當及永遠𣍐化的火做夥住？」 |
| 33:15 | 許個行為公義，講話正直，
厭惡欺壓得來的財利， 搖手拒絕賄賂， 塞耳孔毋聽害人的計謀， 掩目睭無看邪惡， |
| 33:16 | 此款人會住佇高的所在，
用山巖的堡壘做伊的避難所， 米糧供給充足， 水源不斷。 |
| 33:17 | 光榮的將來 恁會親目看著王的光彩， 看見開闊的土地。 |
| 33:18 | 恁會回想早前恐怖的事，心內講：
「今，許個拾稅的佇叨位？ 啲秤進貢的金銀的佇叨位？ 佇守望台啲監視咱的佇叨位？」 |
| 33:19 | 恁𣍐閣看見拗蠻的人民；
𪜶講人聽無的話， 講話喋喋突突，人𣍐了解。 |
| 33:20 | 著注目看錫安，恁守節的城。
恁的目睭會看見耶路撒冷， 一個清靜安穩的住宅，𣍐互人移徙的布棚； 伊的杙仔𣍐閣拔起來， 伊的索𣍐斷去。 |
| 33:21 | 佇遐上主欲對咱顯出威嚴。
遐有開闊的江河及溪， 無戰船經過， 無大隻船往來。 |
| 33:22 | 因為上主是咱的審判官，
是咱的指揮官， 是咱的君王， 伊會解救咱。 |
| 33:23 | 船的索攏冗去，
帆柱徛𣍐在， 船帆搋𣍐開； 彼時，有真多戰利品通分， 連腳跛的人都有份。 |
| 33:24 | 佇遐徛起的人無人會講「我破病」；
住民的罪攏會得著赦免。 |