| 章節 | 現代台語漢字2021版經文 |
| 25:1 | 頌讚的詩歌 上主啊，你是我的上帝； 我欲尊你做大，稱讚你的名； 因為你有用真誠信實 實現對古早就計劃奇妙的事。 |
| 25:2 | 你有互城變做糞埽堆，
互設防的城荒廢， 互外國人的要塞徹底毀壞， 永遠𣍐當重建。 |
| 25:3 | 所以勇猛的人民欲榮耀你；
強暴城市的國民欲驚畏你。 |
| 25:4 | 你一直是散赤人的倚靠，
是欠缺的人艱難中的堡壘， 是狂風暴雨中的避難所， 是炎熱的時的蔭影； 因為強暴的人攻擊的時， 若狂風啲拍城牆。 |
| 25:5 | 外國人的喧嘩親像曠野的炎熱，
你用雲遮蓋，互熱氣消散； 你互強暴的人無閣唱凱旋的歌。 |
| 25:6 | 上帝準備宴席 佇此個山頂，上主 — 萬軍的統帥欲為著萬民準備豐盛的宴席，上好的酒宴；有肥肉，有骨髓，有陳年的好酒。 |
| 25:7 | 佇此個山頂，伊欲將所有的人民掩面的帕，及列國蓋身軀的布提掉。 |
| 25:8 | 至高的上主欲永遠吞滅死亡，對逐個人的面拭去𪜶的目屎；伊欲佇全地除去伊子民的恥辱。上主按呢宣布。 |
| 25:9 | 佇彼日有人會講：「恁看，此位是阮的上帝，阮一直啲仰望伊，伊一定會來解救阮。此位是阮一直啲聽候的上主。咱著來歡喜慶祝伊的拯救。」 |
| 25:10 | 上帝欲處罰摩押 上主的手欲靠佇錫安山頂，毋拘摩押會受踐踏，若麥稿佇糞埽堆互人踐來踐去。 |
| 25:11 | 佇遐摩押會搋開伊的雙手，親像泅水的人伸手欲泅。雖然伊的雙手看起來真扭掠，毋拘無採工；上帝欲互伊的驕傲變見笑。 |
| 25:12 | 高牆頂的堡壘，伊欲給𪜶捙倒毀壞；伊欲給𪜶拆甲變平地，變土粉。 |