| 章節 | 現代台語漢字2021版經文 |
| 23:1 | 審判泰爾 這是有關泰爾的信息。 他施的船隻啊，著悲傷啼哭， 因為泰爾受毀壞，無厝嘛無港口啦！ 對基提的地有話傳到𪜶遐。 |
| 23:2 | 沿海的住民，西頓的生理人啊，著哀哭！
恁過海賺真多錢； |
| 23:3 | 經過大海，載西曷的五穀、
尼羅河兩岸的收成； 泰爾成做萬國的市場。 |
| 23:4 | 西頓，海洋的要塞啊，著見笑，
因為大海有講： 「我毋曾懷孕， 嘛毋曾生你。 我毋曾養飼後生， 嘛毋曾養育查某子。」 |
| 23:5 | 消息傳到埃及的時，
𪜶會為著有關泰爾的風聲非常痛心。 |
| 23:6 | 沿海的住民啊，著過去他施！
著哀哭！ |
| 23:7 | 這豈是古早就建立，繁榮的城市？
有真多人對遮去到真遠的所在做生理。 |
| 23:8 | 泰爾曾指派人做別國的王，
伊的生理人真多是王親， 伊的商人是國戚。 啥人決定欲攻擊泰爾？ |
| 23:9 | 這是上主 — 萬軍的統帥的決定，
欲凌辱泰爾所誇口的榮光， 互世上一切的貴族見笑。 |
| 23:10 | 他施的住民啊，著住滿恁的土地，
親像尼羅河的水氾濫， 無受限制。 |
| 23:11 | 上主已經伸手佇大海的頂面，
欲互列國皮皮惙。 伊下令欲毀壞腓尼基的要塞。 |
| 23:12 | 伊講：「受凌辱的在室女西頓啊，
你𣍐閣有快樂！ 起來！過去基提， 佇遐你嘛𣍐當得著安歇。」 |
| 23:13 | 恁看迦勒底人的地，
伊的人民無閣存在。 亞述人互伊成做野獸住的所在； 𪜶起造攻城的塔， 拆毀伊的宮殿，互此塊地拋荒。 |
| 23:14 | 他施的船隻啊，恁著悲傷啼哭！
恁的堡壘已經受破壞啦。 |
| 23:15 | 佇彼日，泰爾會互人𣍐記得七十年久，及一個王的年歲平長。七十年了後，泰爾的景況會親像歌所啲描寫的妓女：
|
| 23:16 | 你此個互人𣍐記得的妓女啊，
提豎琴佇城內四界行， 彈好聽的歌，吟真多詩， 互人閣會記得你。 |
| 23:17 | 七十年過了，上主會閣眷顧泰爾，泰爾會回復伊的本業，及世界逐國貿易。 |
| 23:18 | 毋拘伊的盈利及所賺的錢攏欲獻互上主；無欲囥啲，嘛無欲囤起來。伊的盈利欲歸互敬拜上主的人，互𪜶食穿攏富足。 |