| 章節 | 現代台語漢字2021版經文 |
| 5:1 | 葡萄園的歌 我為著我所親愛的唱歌， 唱一首有關伊的葡萄園的歌： 我所親愛的有一坵葡萄園 佇一個肥媠的山頭。 |
| 5:2 | 伊掘土，將石頭攏拾㧒确，
然後種真多上好的葡萄樹。 伊佇園內造一個守望台， 閣挖一個踏葡萄的窟仔。 伊期待會出產真多好的葡萄， 毋拘所結的攏是僫的。 |
| 5:3 | 今，耶路撒冷的住民及猶大人啊，
請恁佇我及我的葡萄園中間主持公道。 |
| 5:4 | 我著閣為著我的葡萄園做什麼？
豈有什麼我猶做無夠？ 我期待出產好葡萄， 是按怎所結的攏是僫的？ |
| 5:5 | 今，我給恁講，
我欲按怎處理我的葡萄園。 我欲將園的籬笆拆起來， 互伊受破壞。 我欲拆毀園的圍牆， 互伊受踐踏。 |
| 5:6 | 我無欲閣修剪，無欲閣剷草，
欲互園荒廢， 互刺仔雜草發甲滿四界； 我嘛欲命令雲無落雨佇遐。 |
| 5:7 | 上主 — 萬軍的統帥的葡萄園
就是以色列家； 伊細膩栽種的葡萄樹 是猶大的人民。 伊所期待的是公平， 毋拘所看著的是刣人流血； 伊所向望的是公義， 毋拘只有聽著人喝冤枉。 |
| 5:8 | 譴責社會無公義 慘啊，恁諸個人， 恁的厝一間閣一間， 土地一塊閣一塊； 恁佔甲別人煞無位通徛， 境內賰恁啲住。 |
| 5:9 | 我有聽見上主 — 萬軍的統帥按呢講：
一定有真多大間厝會荒廢， 真多闊閣媠的厝宅無人徛起。 |
| 5:10 | 兩甲的葡萄園才生產二十公升的酒；
撒十籠的種籽收無甲一籠麥仔。 |
| 5:11 | 慘啊，許個對透早就啲趇厚酒飲的人！
𪜶飲酒飲到半暝，飲甲醉茫茫發狂。 |
| 5:12 | 𪜶佇宴席彈琴，彈瑟，
拍鼓，歕𥰔仔，飲酒， 毋拘無啲想上主的計劃， 毋曾注意上主的作為。 |
| 5:13 | 因為我的子民𣍐曉想，
𪜶會受放逐做俘虜； 𪜶中間有地位的人會枵甲啲欲死， 𪜶的群眾嘛會嘴焦甲欲死。 |
| 5:14 | 所以，陰府胃口大開，
無限量開大嘴欲吞食； 佇𪜶中間啲宴樂的貴族， 吵鬧的平民， 攏做一下互伊吞落去。 |
| 5:15 | 人受屈辱，
世間人受降低， 目頭高的人降做卑微。 |
| 5:16 | 毋拘，上主 — 萬軍的統帥
因為公平受高舉； 至聖的上帝 因為公義顯明家己是聖。 |
| 5:17 | 羊仔會若準佇家己的牧場啲食草；
細隻羊仔會佇好額人拋荒去的土地尋食。 |
| 5:18 | 慘啊，許個用欺詐做索扭罪過，
用拖車的索拖罪惡的人！ |
| 5:19 | 𪜶講：「上主著趕緊，
較緊完成伊的工作，互阮會當看著。 以色列神聖的上帝著趕緊實行伊的計劃， 互阮會當知影。」 |
| 5:20 | 慘啊，許個給善講做惡，給惡講做善的人！
𪜶用暗做光，用光做暗； 𪜶用苦做甜，用甜做苦。 |
| 5:21 | 慘啊，許個想講家己有智慧，
家己真巧的人！ |
| 5:22 | 慘啊，許個飲酒展英雄，
調酒拼頭名的人！ |
| 5:23 | 𪜶收賄賂判有罪的做無罪，
剝削無辜的人應該有的權益。 |
| 5:24 | 所以，𪜶會親像麥稿互火舌吞食，
親像焦草互火燒了了； 𪜶的根會爛去， 𪜶的花若塵埃互風吹散； 因為𪜶拒絕上主 — 萬軍的統帥的律法， 無視以色列神聖的上帝的話。 |
| 5:25 | 所以，上主對伊的子民發受氣；
伊伸出伊的手對付𪜶，拍𪜶； 因為按呢，眾山搖泏， 街頭巷尾身屍若糞埽擲甲滿四界。 雖然是按呢，伊的受氣猶未煞； 伊的手猶伸長長欲處罰𪜶。 |
| 5:26 | 上主𫞼大旗做信號，召真遠的國家來；
伊出號令叫人對天邊海角來。 看咧，𪜶真緊就來！ |
| 5:27 | 來的人無厭倦的，無跋倒的，
無盹佝的，無愛睏的； 逐個腰帶攏縖好勢， 無一個鞋帶斷去。 |
| 5:28 | 𪜶的箭磨利利，
弓攏張緊緊； 𪜶的戰馬的蹄親像碇的石， 戰車的輪親像捲螺仔風。 |
| 5:29 | 𪜶喉叫親像獅啲哮，
喉叫親像少壯的獅啲哮。 𪜶咬著獵物噤噤哮， 將獵物拖離開， 無人會當給伊救出來。 |
| 5:30 | 佇彼日，𪜶會對以色列噤噤哮，
親像大海嘩嘩哮。 人若看此個國家， 只有看著烏暗及災難； 密雲遮蓋，光明攏變烏暗。 |