| 章節 | 現代台語漢字2021版經文 |
| 2:1 | 永遠的和平 ( 彌 4:1-3 ) 亞摩斯的子以賽亞所得著有關猶大及耶路撒冷的信息。 |
| 2:2 | 佇將來的日子，
上主聖殿的山會堅立佇眾山的頂面， 比攏總的山嶺較高； 萬國攏會溢倚來歸伊。 |
| 2:3 | 萬民會來，講：
「咱來上上主的山， 來去雅各的上帝的殿。 伊會用伊的道路教示咱， 互咱通行伊的路。」 律法會對錫安發出； 上主的話會對耶路撒冷傳開。 |
| 2:4 | 上主會佇列國中施行審判，
佇萬民中排解紛爭。 𪜶會將刀拍做犁頭， 將槍拍做鐮刀。 此國𣍐閣攑刀攻擊彼國， 𪜶嘛免閣學戰爭。 |
| 2:5 | 雅各的後代啊，來！
咱著靠上主的光來行。 |
| 2:6 | 自高的受刑罰 上帝啊，你有棄拺你的子民 雅各的後代， 因為國內逐所在攏有東方來的風俗， 人民親像非利士人啲卜卦， 閣趁外國人的習慣。 |
| 2:7 | 以色列全國金銀滿滿是；
𪜶的財寶算𣍐了。 𪜶的地戰馬真多； 𪜶的戰車𣍐當計算。 |
| 2:8 | 全國逐所在都有偶像；
𪜶跪拜家己的手所造的， 拜家己的指頭仔捏造的神明。 |
| 2:9 | 所以，人受屈辱，
逐個人變做卑賤。 上主啊，毋通赦免𪜶。 |
| 2:10 | 著匿入去石洞！
著藏入去土底！ 閃避對上主來的恐怖， 走閃伊威嚴的光輝。 |
| 2:11 | 彼日，目頭高的人會受降低，
驕傲的人會受屈辱。 只有上主受高舉得著尊崇！ |
| 2:12 | 上主 — 萬軍的統帥的日啲欲臨到；
伊欲互所有驕傲自高的人變卑賤， 互高舉家己的人攏受侮辱。 |
| 2:13 | 伊欲互黎巴嫩高閣大的柏香樹、
巴珊的橡樹、 |
| 2:14 | 所有的高山、
一切的小山、 |
| 2:15 | 所有的堡壘、
一切堅固的城牆、 |
| 2:16 | 所有他施的船隻、
一切媠的帆船， 攏受攻擊。 |
| 2:17 | 後來，自高的人會受屈辱；
驕傲的人會受降低。 佇彼日，只有上主受高舉得著尊崇。 |
| 2:18 | 偶像會完全消失。
|
| 2:19 | 佇上主起來互地大搖動的時，
人會匿入去石洞， 藏入去土孔， 欲閃避對上主來的恐怖， 走閃伊威嚴的光輝。 |
| 2:20 | 佇彼日，人會將用金銀造來拜的偶像
㧒确互田鼠及密婆。 |
| 2:21 | 佇上主起來互地大搖動的時，
人會走入去石洞內， 抑是匿佇山壁縫， 欲閃避對上主來的恐怖， 走閃伊威嚴的光輝。 |
| 2:22 | 毋通倚靠會死的人；
𪜶不過靠鼻孔啲喘氣。 𪜶攏無算什麼。 |