| 章節 | 現代台語漢字2021版經文 |
| 1:1 | 下面是亞摩斯的子以賽亞所看見的異象；這是烏西亞、約坦、亞哈斯、希西家做猶大王的時，伊所得著有關猶大及耶路撒冷的信息。 |
| 1:2 | 猶大的邪惡 天啊，著聽！ 地啊，著注意聽！ 因為上主講： 「我養育子兒，給𪜶飼大漢， 𪜶竟然背叛我。 |
| 1:3 | 牛識家己的主人，
驢會認得主人的槽； 毋拘以色列毋識我， 我的子民攏𣍐曉想。」 |
| 1:4 | 唉，犯罪的民族！
罪惡極重的子民！ 作惡多端的族類！ 行為敗壞的子孫！ 𪜶棄拺上主， 藐視以色列神聖的上帝。 𪜶攏越轉身離開伊。 |
| 1:5 | 是按怎恁愛閣受鞭拍？
是按怎恁欲繼續背叛？ 恁歸粒頭殼攏有病， 歸個心攏受傷； |
| 1:6 | 對頭到腳，無一位健全，
攏是傷痕、烏青、啲流血的孔嘴； 孔嘴猶未洗清氣，猶未包紮， 嘛猶未用油抹。 |
| 1:7 | 恁的國土拋荒；
恁的城市互火燒毀。 恁親目看著田園互外國人吞食， 互生份人踐踏，變做荒埔。 |
| 1:8 | 只有賰耶路撒冷留啲，
親像葡萄園內的草寮仔， 刺瓜仔園內的草棚仔， 親像一個受圍困的城。 |
| 1:9 | 若毋是上主 — 萬軍的統帥
給咱留幾個仔賰落來的子民， 咱早就親像所多瑪赫害， 親像蛾摩拉赫慘！ |
| 1:10 | 恁諸個所多瑪的官長啊，
著聽上主的話！ 恁諸個蛾摩拉的人民啊， 著注意聽咱的上帝的教示！ |
| 1:11 | 上主講：
「恁獻赫多祭物互我， 有什麼路用？ 我無稀罕綿羊的燒化祭； 肥滋滋的牲生的油，我真厭。 我嘛無合意牛、羊羔，及山羊的血。 |
| 1:12 | 「恁來朝見我，
是啥人叫恁帶諸個牲生 來踐踏我聖殿的埕？ |
| 1:13 | 毋通閣提無路用的祭物來；
香的味我真厭惡。 初一、安歇日、召集的聚會， 我忍𣍐牢。 我𣍐當容忍恁犯罪閣守嚴肅會。 |
| 1:14 | 恁初一及定期的節慶，
我非常討厭； 諸個攏變做我的重擔， 我真煩，無愛閣擔。 |
| 1:15 | 恁手攑高高祈禱的時，
我會掩目睭毋看恁； 恁祈禱偌多遍， 我嘛毋聽； 因為恁雙手攏沐著刣人的血。 |
| 1:16 | 恁著洗，洗互清氣；
著除去一切邪惡的行為， 互我無閣看著恁啲做歹。 |
| 1:17 | 著學習行好。
著追求正義，解救受欺壓的； 著為孤兒申冤，為寡婦辯護。」 |
| 1:18 | 上主講：
「來，咱來辯論！ 雖然恁的罪親像朱紅， 猶會變做親像雪赫白； 雖然親像烏𪐞紅， 猶會變做親像羊毛赫白。 |
| 1:19 | 恁若願意聽趁，
恁會當食土地出產上好的物。 |
| 1:20 | 毋拘恁若毋順趁，反叛，
恁會受刀劍吞滅。」 上主親嘴按呢宣布。 |
| 1:21 | 墮落的城 本來忠誠的城竟然變做娼妓！ 以前城內充滿正直， 公義佇內面徛起； 今仔日住佇遐的是刣人的兇手！ |
| 1:22 | 你的銀已經變做渣滓；
你的酒攏透水。 |
| 1:23 | 你的官長背叛，
變做賊的同伴； 𪜶攏愛收賄賂， 四界要求人送禮。 𪜶無為孤兒主持公道； 寡婦的控訴，𪜶毋插。 |
| 1:24 | 所以，上主 — 萬軍的統帥、
以色列的大能者按呢講： 「啊，你成做我的對敵！ 我欲將大受氣摒佇你頂面； 我欲報復敵對我的人！ |
| 1:25 | 我欲下手處罰你；
我欲將你的渣滓煉清氣， 將雜質攏除盡。 |
| 1:26 | 我欲重新設立你的審判官，
親像早前一樣； 閣設立你的參謀， 及起初像款。 然後，你會閣叫做公義的城，忠誠之都。」 |
| 1:27 | 耶路撒冷會因為公平得著救贖；
城內反悔的人會因為公義得著解救。 |
| 1:28 | 毋拘背逆的及罪人會做一下受拍碎；
棄絕上主的人會滅亡。 |
| 1:29 | 恁以前所意愛聖的橡樹，
恁會因為伊感覺見笑。 恁早前選擇的園仔， 今會因為伊感覺歹勢。 |
| 1:30 | 因為恁會親像葉啲欲焦去的橡樹，
親像無水的園仔。 |
| 1:31 | 有權勢的會變做火種，
伊的所做親像火星， 兩項做一下𤏸起來， 無人會當給伊拍化。 |