| 章節 | 現代台語漢字2021版經文 |
| 5:1 | (男) 我的小妹，我的新娘啊，我有入去我的園內， 挽我的沒藥及芳料， 食蜜房及蜜， 飲我的酒及奶。 |
| 5:2 | 第四首 (女) 我啲睏，毋拘心猶精神。 聽咧，我親愛的啲拍門，講： (男) 我的小妹，我的愛人， 我純全的粉鳥，給我開門； 我的頭殼互露水滴霑， 我的頭毛霑漉漉。 |
| 5:3 | (女) 我已經褪衫，著閣穿噢？ 我已經洗腳，著閣拍垃墋噢？ |
| 5:4 | 我親愛的對門縫伸手入來；
我的心為著伊激動。 |
| 5:5 | 我起來，欲給我親愛的開門；
沒藥對我的雙手滴落去， 對指頭仔滴落去門閂。 |
| 5:6 | 我給我親愛的開門；
毋拘我所愛的已經越轉身去啊。 伊抵即講的話，互我神不附體。 我尋伊，尋無；我叫伊，伊無應。 |
| 5:7 | 城內巡邏的人抵著我，
拍我，傷我； 顧城牆的人將我幔身軀的巾搶去。 |
| 5:8 | 耶路撒冷的查某囝仔啊，我拜託恁，
恁若抵著我親愛的，著給伊講： 我因為愛情致病。 |
| 5:9 | (耶路撒冷的查某囝仔) 你此個查某囝仔中上媠的啊， 你親愛的，比別人親愛的有什麼較好？ 你親愛的，比別人親愛的有什麼較好， 值得阮答應你的要求？ |
| 5:10 | (女) 我親愛的英俊閣勇壯， 是萬人中的第一。 |
| 5:11 | 伊的頭殼若純金；
伊的頭毛艷閣虯，烏親像烏鴉。 |
| 5:12 | 伊的目睭親像歇佇溪邊的粉鳥，
用奶洗過，親像寶石安置好勢。 |
| 5:13 | 伊的嘴䩃親像花園淐出芳味；
伊的嘴唇親像百合花，滴落真芳的沒藥。 |
| 5:14 | 伊的雙手親像金的柺鑲青玉；
伊的身軀親像光滑的象牙鑲藍寶石。 |
| 5:15 | 伊的雙腳親像大理石的柱，安置佇純金的座；
伊的體格雄偉親像黎巴嫩， 媠親像柏香樹。 |
| 5:16 | 伊的嘴真甜，人人意愛。
耶路撒冷的查某囝仔啊， 伊就是我親愛的，是我的愛人。 |