| 章節 | 現代台語漢字2021版經文 |
| 4:1 | (男) 我的愛人，你真媠，你實在真媠！ 你的目睭親像粉鳥匿佇帕的內面； 你的頭毛親像歸陣山羊倒佇基列的山坪。 |
| 4:2 | 你的嘴齒親像抵剪毛歸群的羊母，
洗清氣對水裡𬦰起來； 逐隻攏生雙生，無一隻拍損。 |
| 4:3 | 你的嘴唇親像朱紅的線；
你的嘴生做真好看； 你的鬢邊佇帕的內面， 親像擘開的石榴。 |
| 4:4 | 你的頷頸親像大闢的塔堅固好看，
吊滿勇士的盾牌。 |
| 4:5 | 你兩粒奶親像一對鹿仔，
親像鹿母的雙生子， 佇百合花中啲食草。 |
| 4:6 | 日涼冷，影伸長的時，
我欲去沒藥的山，及乳香的山頭。 |
| 4:7 | 我的愛人，你實在真媠，
無一點仔通嫌。 |
| 4:8 | 我的新娘啊，離開黎巴嫩，及我做夥來去；
對亞瑪拿的山頂，對示尼珥，就是黑門的山頂， 對獅的穴，對豹住的山趕緊落來。 |
| 4:9 | 我的小妹，我的新娘啊，你有奪我的心；
你目睭一下看， 用你頷頸的一條金鍊仔就給我的心奪去。 |
| 4:10 | 我的小妹，我的新娘，你的愛情哪赫美妙。
你的愛情實在比酒較好； 你膏油的芳味比所有的香料較芳。 |
| 4:11 | 我的新娘啊，你的嘴唇甜親像對蜂房滴落來的蜜；
你的舌有蜜有奶； 你的衣服有黎巴嫩的芳味。 |
| 4:12 | 我的小妹，我的新娘，是鎖啲的園，
蓋密的井，封密的水泉。 |
| 4:13 | 你栽種石榴的園，出真多種上好的果子，
閣有指甲花及哪噠樹。 |
| 4:14 | 有哪噠及番紅花，
菖蒲、肉桂，及乳香， 沒藥、沉香，及一切上等的芳料。 |
| 4:15 | 你是園中的水泉，活水的井，
對黎巴嫩流落來的溪水。 |
| 4:16 | (女) 北風啊，起來；南風啊，吹來； 吹來我的園，互伊的芳味遍滿逐所在； 互我親愛的入伊的園內， 享受上好的果子。 |