| 章節 | 現代台語漢字2021版經文 |
| 6:1 | 我看見日光的下面有一項不幸重重硩佇人的身上。 |
| 6:2 | 有人得著上帝賜伊錢財、好額、尊貴，伊的心所愛的無欠半項；毋拘上帝互伊𣍐當享受，反轉互外人享受；這嘛是空虛，是大悲哀。 |
| 6:3 | 人若有一百個子，閣食長歲壽，雖然活真多歲，毋拘無享福無滿足，閣無得著安葬；我講，流產的胎嘛比伊較好。 |
| 6:4 | 此個胎來是空虛，隨時進入烏暗；伊的名受烏暗蓋密消失。 |
| 6:5 | 伊毋曾看著日光，嘛無知覺，猶久比彼個老人得著較好的安歇。 |
| 6:6 | 彼個人雖然活到一千年閣一千年，毋拘無享福；𪜶兩款人豈毋是攏著去仝一個所在？ |
| 6:7 | 人的勞碌攏是為著腹肚，毋拘食慾永𣍐滿足。 |
| 6:8 | 智慧的人比愚戇的人豈有較𠢕？散赤人知按怎作人，豈有路用？ |
| 6:9 | 目睭看著的比心想的較好。這嘛是空虛，嘛是掠風。 |
| 6:10 | 已經有的，早就號名；人是什麼，嘛早就知；無人會當及比伊較強的對抗。 |
| 6:11 | 話多，空虛就愈多，對人有什麼利益？ |
| 6:12 | 人一生虛度光陰親像影過去，啥人會知人活啲的時什麼上好？啥人會當給伊講，伊死後，佇日光的下面會發生什麼代誌？ |