| 章節 | 現代台語漢字2021版經文 |
| 4:1 | 我閣看著佇日光的下面所發生一切壓迫的代誌：受壓迫的人流目屎，無人給𪜶安慰；因為壓迫𪜶的有勢力，受壓迫的無人給𪜶安慰。 |
| 4:2 | 因為按呢，我給許個已經死去的人恭喜，𪜶比猶活啲的人較幸福。 |
| 4:3 | 閣許個猶未出世，未看見日光下面所發生歹的代誌的，我看𪜶比此兩款人猶較好。 |
| 4:4 | 我閣看著人一切的勞苦及逐款工作的成就，是因為人及人中間的怨妒競爭造成的。這嘛是空虛，嘛是掠風。 |
| 4:5 | 愚戇的人手攬胸毋做代誌，枵甲餓死。 |
| 4:6 | 一手滿滿毋拘安然自在，比雙手滿滿著勞碌閣掠風較好。 |
| 4:7 | 我閣看著佇日光的下面有空虛的事： |
| 4:8 | 有人孤單無伴，無子嘛無兄弟，猶久勞碌無煞，無看所有的財富做夠額。伊講：我勞碌刻苦，無享福，到底是為啥人？這嘛是空虛，是無意義的工作。 |
| 4:9 | 兩個人比一個較好，因為兩個合作會得著較好的效果； |
| 4:10 | 若一個跋倒，猶有一個會當給伊扶起來；若家己一個，跋倒的時無人通給伊扶起來，此個人就真不幸。 |
| 4:11 | 兩個人做夥睏較燒烙，家己一個哪會燒？ |
| 4:12 | 受攻擊的時，干焦一個人拍𣍐贏，若有兩個就會當抵抗。三股的索無赫好擦斷。 |
| 4:13 | 散赤有智慧的少年人比年老毋肯受忠告愚戇的王較好。 |
| 4:14 | 有人對監獄出來，後來作王；有人出世佇王宮，後來變做散赤。 |
| 4:15 | 我看佇日光的下面啲生活的人民攏跟隨續接作王的少年人。 |
| 4:16 | 伊有領導真多人民，毋拘後來的人對伊無合意。這嘛是空虛，嘛是掠風。 |