| 章節 | 現代台語漢字2021版經文 |
| 1:1 | 佇耶路撒冷作王，大闢的子，傳道者的話。 |
| 1:2 | 人生的空虛 我 — 傳道者講：空虛的空虛；空虛的空虛；一切攏是空虛。 |
| 1:3 | 人一切的勞苦拍拼，就是佇日光下面的勞碌有什麼利益？ |
| 1:4 | 一代過了閣一代，毋拘地照常存在。 |
| 1:5 | 日出，日落，緊緊倒轉去出來的所在。 |
| 1:6 | 風向南吹，閣倒轉向北，無停轉踅，閣踅轉去原來的所在。 |
| 1:7 | 江河攏流入海，毋拘海嘛𣍐滿；江河流到叨位，閣流轉去原來的所在。 |
| 1:8 | 諸個代誌互人倦閣畏；講嘛講𣍐了，看嘛看𣍐飽，聽嘛聽𣍐完。 |
| 1:9 | 以前已經有的，將來會閣有；以前已經做的，將來會閣做；日光的下面無新的代誌。 |
| 1:10 | 豈有什麼事，人會當講「你看，這是新的」？佇咱以前的世代，早就有啦。 |
| 1:11 | 已經過去的世代，無人會記得；將來的世代，後來的人嘛𣍐記得。 |
| 1:12 | 傳道者的經驗 我 — 傳道者曾佇耶路撒冷做以色列王。 |
| 1:13 | 我專心用智慧研究查考天下所發生一切的代誌，就知這是上帝所互人無意義的勞苦。 |
| 1:14 | 我觀察日光的下面所發生一切的代誌，看出一切攏是空虛，攏是掠風。 |
| 1:15 | 彎曲的𣍐當互伊直；欠缺的補𣍐滿。 |
| 1:16 | 我想講，我有大智慧，比前到今所有治理耶路撒冷的人較有智慧；我嘛有吸收真多智慧及見識。 |
| 1:17 | 我專心致意明白智慧，愛明白癲狂及愚戇，就知這嘛是掠風。 |
| 1:18 | 因為人愈有智慧愈有煩惱，愈有智識愈有憂傷。 |