| 章節 | 現代台語漢字2021版經文 |
| 6:1 | 上主對摩西講：「今，你會看著我按怎對付埃及王；我欲用大氣力的手，迫伊放我的子民出去，給𪜶趕離開伊的地。」 |
| 6:2 | 上帝應允欲解救以色列人 上帝閣對摩西講：「我是上主。 |
| 6:3 | 我是全能的上帝，曾對亞伯拉罕、以撒、雅各顯現，毋拘我毋曾互𪜶知我的名是上主。 |
| 6:4 | 我曾及𪜶立約，應允欲將𪜶寄居的迦南地賞賜互𪜶。 |
| 6:5 | 我嘛有聽著以色列人佇埃及做苦工所發出哼哼呻的聲，就會記得我及𪜶祖先所立的約。 |
| 6:6 | 所以你著給以色列人講：『我是上主。我欲救恁脫離埃及人的壓迫，互恁毋免閣做𪜶的奴隸，我閣欲出手嚴嚴刑罰𪜶來救贖恁。 |
| 6:7 | 我欲接納恁做我的子民，我欲做恁的上帝。我救恁脫離埃及人的壓迫的時，恁會認識我是上主 — 恁的上帝。 |
| 6:8 | 我所立誓應允欲互亞伯拉罕、以撒、雅各彼塊地，我欲導恁入去，將彼個地賞賜恁做產業。我是上主。』」 |
| 6:9 | 摩西將諸個話給以色列人講，毋拘𪜶因為做苦工，失志，聽𣍐入去。 |
| 6:10 | 上主吩咐摩西講： |
| 6:11 | 「你去給埃及王法老講，著放以色列人離開伊的地。」 |
| 6:12 | 摩西對上主講：「以色列人都毋聽我，埃及王哪會聽我此個頇顢講話的人？」 |
| 6:13 | 上主命令摩西及亞倫去以色列人及埃及王遐，將以色列人對埃及地導出來。 |
| 6:14 | 摩西及亞倫的族譜 下面是以色列的族長：雅各的大子呂便的子是以諾、法路、希斯崙，及迦米；諸個是呂便的宗族。 |
| 6:15 | 西緬的子是耶慕利、雅憫、阿轄、雅斤、瑣轄，以及及迦南的女子所生的掃羅；諸個是西緬的宗族。 |
| 6:16 | 下面是利未的子的名，照𪜶的家譜是革順、哥轄，及米拉利；利未活一百三十七歲。 |
| 6:17 | 革順的子，照𪜶的家族，是立尼及示每。 |
| 6:18 | 哥轄的子是暗蘭、以斯哈、希伯崙、烏薛；哥轄活一百三十三歲。 |
| 6:19 | 米拉利的子是抹利及慕示。諸個是利未照𪜶的家譜所記載的宗族。 |
| 6:20 | 暗蘭娶伊的阿姑約基別作某，生亞倫及摩西；暗蘭活一百三十七歲。 |
| 6:21 | 以斯哈的子是可拉、尼斐，及細基利。 |
| 6:22 | 烏薛的子是米沙利、以利撒反，及西提利。 |
| 6:23 | 亞倫娶亞米拿達的查某子，拿順的小妹以利沙巴作某，生拿答、亞比戶、以利亞撒，及以他瑪。 |
| 6:24 | 可拉的子是亞惜、以利加拿，及亞比亞撒；諸個是可拉的家族。 |
| 6:25 | 亞倫的子以利亞撒娶普鐵一個查某子作某，生非尼哈；諸個是利未人逐個家族的族長。 |
| 6:26 | 亞倫及摩西就是上主曾對𪜶講「著導以色列人一隊一隊離開埃及地」彼兩個人。 |
| 6:27 | 對埃及王法老講欲導以色列人出埃及的，嘛是摩西及亞倫。 |
| 6:28 | 上主命令摩西及亞倫 有一日，上主佇埃及地對摩西講話。 |
| 6:29 | 上主對摩西講：「我是上主。我對你講的話，你攏著給埃及王法老講。」 |
| 6:30 | 摩西對上主講：「我是頇顢講話的人，埃及王哪會聽我？」 |