| 章節 | 現代台語漢字2021版經文 |
| 5:1 | 摩西及亞倫見埃及王 後來，摩西及亞倫去見埃及王，對伊講：「上主 — 以色列的上帝按呢講：『著互我的子民去曠野守節敬拜我。』」 |
| 5:2 | 埃及王講：「上主是啥人？我哪著聽伊的話，互以色列人離開？我毋識伊，嘛不准以色列人離開。」 |
| 5:3 | 摩西及亞倫講：「希伯來人的上帝對阮顯現；請互阮行三日的路程去曠野，向上主 — 阮的上帝獻祭，才免伊用瘟疫及刀劍傷害阮。」 |
| 5:4 | 埃及王給𪜶講：「摩西、亞倫，恁是按怎叫此個百姓作工？轉去作工！」 |
| 5:5 | 埃及王閣講：「現在，此個民族人即多，恁竟然叫𪜶停工。」 |
| 5:6 | 彼日，埃及王命令埃及的督工及以色列的工頭，講： |
| 5:7 | 「恁閣親像以前款麥稿互此個百姓做磚仔；麥稿，互𪜶家己去拾。 |
| 5:8 | 著要求𪜶做及以前仝款數目的磚仔，連一塊都𣍐減得。𪜶貧憚，所以大聲要求欲出去向𪜶的上帝獻祭。 |
| 5:9 | 著互諸個人做較重的工作，互𪜶悿甲𣍐去聽人使弄。」 |
| 5:10 | 埃及的督工及以色列的工頭對人民宣布：「埃及王按呢講：『我無欲閣麥稿互恁。 |
| 5:11 | 恁家己去尋，家己去拾，毋拘恁交出來的磚仔𣍐用得減少。』」 |
| 5:12 | 以色列人就四散去埃及全地，拾麥欉的頭代替麥稿。 |
| 5:13 | 督工壓迫𪜶，講：「恁逐日交出來的磚仔的數目，著及有互恁麥稿的時像款。」 |
| 5:14 | 埃及王的督工拍𪜶派去管理以色列人的工頭，講：「此幾日恁哪無照以前規定的數目交磚仔？」 |
| 5:15 | 以色列的工頭就來給埃及王哀求，講：「你是按怎按呢對待阮？ |
| 5:16 | 督工無麥稿互阮，閣要求阮著交像款數目的磚仔。阮互人拍，攏是恁埃及人的毋著。」 |
| 5:17 | 王講：「恁實在貧憚，有夠貧憚，才要求欲去給上主獻祭。 |
| 5:18 | 現在，恁著轉去作工；麥稿毋互恁，磚仔的數量𣍐用得減。」 |
| 5:19 | 以色列人的工頭聽著逐日交磚仔的數量𣍐減得，就知影慘啊。 |
| 5:20 | 𪜶對埃及王遐出來的時，抵著摩西及亞倫啲等𪜶。𪜶就給摩西及亞倫講： |
| 5:21 | 「願上主監察，給恁刑罰，因為恁害阮互埃及王及伊的人臣怨慼，互𪜶有理由刣阮。」 |
| 5:22 | 摩西怨嘆上主 摩西倒轉去上主遐，講：「主啊，你是按怎歹款待此個民族？是按怎派我？ |
| 5:23 | 對我第一遍去見埃及王，奉你的名對伊講話開始，伊就壓迫此個民族；你一屑仔都無救你的子民。」 |