| 章節 | 現代台語漢字2021版經文 |
| 1:1 | 箴言的價值 大闢的子，以色列王所羅門的箴言。 |
| 1:2 | 諸個箴言會互人得著智慧及教示，
理解深奧的道理； |
| 1:3 | 會互人受教示，用智慧辦代誌，
實踐公義、公正，及公平。 |
| 1:4 | 諸個話會互戇直的人有靈巧，
互少年人有智識，𠢕計劃； |
| 1:5 | 會互有智慧的人聽了加添學識，
互聰明的人得著真的見識； |
| 1:6 | 會互人明白箴言及譬喻，
了解智慧的人的話及寓言。 |
| 1:7 | 敬畏上主是智識的根本；
愚戇的人藐視智慧及教示。 |
| 1:8 | 對少年人的勸告 我的子啊，著聽老父的教督； 毋通棄拺老母的教示。 |
| 1:9 | 因為諸個話會做你頭殼頂的花冠，
做你頷頸的金鍊。 |
| 1:10 | 我的子啊，歹人若引誘你，
毋通隨伊去。 |
| 1:11 | 𪜶若講：「及阮鬥陣來去，
來去埋伏刣人， 當等無辜的人，來給刣。 |
| 1:12 | 咱親像陰府來給𪜶活活吞落去；
𪜶會親像陷落深坑的人互咱歸個吞落去。 |
| 1:13 | 咱會當得著逐款的財物，
所搶的囤滿咱的厝。 |
| 1:14 | 你來加入阮的黨，
搶來的財物大家攏有份。」 |
| 1:15 | 我的子啊，毋通隨𪜶去，
著約束你的腳無踏入𪜶的路。 |
| 1:16 | 因為𪜶趕欲做歹，
急欲刣人。 |
| 1:17 | 佇鳥仔的目睭前設羅網，
所做無採工。 |
| 1:18 | 𪜶埋伏欲害人，反轉害著家己，
當等欲傷人，顛倒傷著家己。 |
| 1:19 | 人若不擇手段取得財利，
結局一定失去家己的性命。 |
| 1:20 | 智慧的呼聲 智慧佇街路大聲啲叫， 佇市場口大聲啲喝； |
| 1:21 | 佇鬧熱的街路頭大聲啲叫，
佇城門口大聲講： |
| 1:22 | 「戇直的人愛戇直欲偌久？
藐視智識的人愛藐視智識欲偌久？ 愚戇的人厭惡智識欲偌久？ |
| 1:23 | 我責備恁，恁若聽趁，
我欲對恁吐露我的心意， 互恁明白我的話。 |
| 1:24 | 我叫，恁毋聽；
我邀請，無人反應； |
| 1:25 | 恁無視我一切的勸戒，
毋肯接受我的責備。 |
| 1:26 | 所以，恁抵著患難，我欲冷笑；
恁抵著驚惶，我欲恥笑。 |
| 1:27 | 當驚惶親像狂風吹來，
災禍親像捲螺仔風掃來， 患難痛苦臨到恁， |
| 1:28 | 彼時恁欲求叫我，我毋聽，
迫切尋我，尋𣍐著。 |
| 1:29 | 因為恁厭惡智識，
無愛敬畏上主， |
| 1:30 | 毋聽我的勸戒，
藐視我的責備， |
| 1:31 | 所以恁會食家己所種的歹果子，
家己計謀的惡果食甲飽閣厭。 |
| 1:32 | 戇直的人會互家己的固執害死；
愚戇的人會因為自滿致到滅亡。 |
| 1:33 | 毋拘聽趁我的話的人會安穩徛起，
免驚災禍，享受平安。」 |