| 章節 | 現代台語漢字2021版經文 |
| 7:1 | 大水 上主對挪亞講：「你及恁全家攏著入大船；因為此世代的人干焦你佇我的面前是義人。 |
| 7:2 | 所有禮儀上清氣的牲生，你著帶七隻公的，七隻母的；無清氣的牲生，你著帶一隻公的，一隻母的。 |
| 7:3 | 飛鳥嘛著帶七隻公的，七隻母的，通佇全地傳種。 |
| 7:4 | 閣過七日，我欲落雨四十暝四十日，將我所造一切的活物攏對地上剿滅。」 |
| 7:5 | 挪亞就攏照上主的命令去做。 |
| 7:6 | 大水佇地上氾濫的時，挪亞六百歲。 |
| 7:7 | 挪亞及伊的子、伊的某、伊的新婦，攏入大船，閃避大水。 |
| 7:8 | 禮儀上清氣的牲生及無清氣的牲生、飛鳥，及地上啲爬的動物， |
| 7:9 | 攏一對一對，有公的有母的，去挪亞遐，照上帝對挪亞的命令進入大船。 |
| 7:10 | 七日後，大水佇地上氾濫。 |
| 7:11 | 挪亞六百歲彼年的二月十七彼日，深淵的水源裂開，天頂的水門攏拍開。 |
| 7:12 | 雨落四十暝四十日。 |
| 7:13 | 就佇彼日，挪亞及伊的子，閃、含、雅弗，及挪亞的某，以及伊三個新婦攏入大船； |
| 7:14 | 所有的野獸、牲生、啲爬的動物、有翼的活物，以及飛鳥，各照𪜶的種類，攏及挪亞全家進入大船。 |
| 7:15 | 一切有性命的活物攏一對一對去挪亞遐，進入大船。 |
| 7:16 | 所有入大船的動物，照上帝對挪亞的命令，有公的有母的；上主就給大船的門關起來。 |
| 7:17 | 水佇地上氾濫四十日；水漲高，將大船撐起來，互船對地面浮起來。 |
| 7:18 | 水勢真大，佇地上直直漲起來；船佇水面飄流。 |
| 7:19 | 水愈漲愈高，給天下的高山攏淹過。 |
| 7:20 | 水比山高七公尺；山頭攏互水淹了了。 |
| 7:21 | 地上所有的活物，包括飛鳥、牲生、野獸、歸群啲爬的動物，以及所有的人，攏死。 |
| 7:22 | 所有佇地上用鼻孔喘氣的活物攏死。 |
| 7:23 | 地上所有的活物攏受消滅；人及牲生、啲爬的動物，以及空中的飛鳥，攏對地上消滅；只有賰挪亞以及許個及伊佇大船內面的猶活啲。 |
| 7:24 | 大水佇地上氾濫一百五十日。 |