| 章節 | 現代台語漢字2021版經文 |
| 49:1 | 雅各最後的祝福 雅各叫伊所有的子來，講：「恁攏聚集倚來，我欲將恁以後會抵著的事給恁講： |
| 49:2 | 雅各的子，著聚集來聽，
聽恁老父以色列的話。 |
| 49:3 | 「呂便，你是我的大子，我的精力，
是我勇壯的時生的第一個子， 應該極其尊榮，氣力超群。 |
| 49:4 | 毋拘你親像四界沖的大水，
𣍐當閣佇兄弟中作大； 因為你𬦰上恁老父的眠床， 𬦰起去我的床舖，給伊拍垃墋。 |
| 49:5 | 「西緬及利未是兄弟；
𪜶的刀劍是殘忍的武器。 |
| 49:6 | 我的心神，毋通及𪜶共謀；
我的神魂，毋通及𪜶參詳； 因為𪜶佇受氣中刣死人， 亂使割斷牛的大腿筋。 |
| 49:7 | 𪜶的受氣猛烈，會受咒詛；
𪜶的大受氣殘忍，會受咒詛； 我欲分散𪜶佇雅各家， 拍散𪜶佇以色列逐支族。 |
| 49:8 | 「猶大，你的兄弟欲謳咾你；
你的手欲扼對敵的頷頸； 你的老父的子欲屈服佇你面前。 |
| 49:9 | 猶大是細隻獅；
我的子，你掠著獵物就倒去洞穴。 猶大仆啲親像獅公， 倒啲親像獅母， 啥人敢惹伊？ |
| 49:10 | 王權無離開猶大，
伊的後代久長統治； 萬國會來進貢； 萬民攏來歸順。 |
| 49:11 | 猶大縛細隻驢仔佇葡萄樹，
縛驢仔子佇上好的葡萄樹； 伊用葡萄酒洗衫， 用葡萄汁洗衣服。 |
| 49:12 | 伊的目睭因為飲酒紅，
伊的嘴齒因為飲奶白。 |
| 49:13 | 「西布倫欲徛起佇海邊，
欲做拋船的港口； 伊的境界會到西頓。 |
| 49:14 | 「以薩迦是勇壯的驢，
倒佇伊揹的兩腳袋仔中間。 |
| 49:15 | 伊愛安靜徛起，
留佇肥媠的土地； 伊俯肩頭擔重擔， 成做做苦工的奴隸。 |
| 49:16 | 「但欲為著家己的人民主持公道，
親像以色列別個支族。 |
| 49:17 | 但欲做路裡的蛇，
做路中的毒蛇， 咬馬的腳後蹬， 互騎馬的人倒摔向摔落去。 |
| 49:18 | 「上主啊，我啲聽候你的拯救。
|
| 49:19 | 「迦得欲互對敵追趕，
毋拘伊顛倒欲追趇𪜶的腳後蹬。 |
| 49:20 | 「亞設的物產豐富，
通做王室的好食物。 |
| 49:21 | 「拿弗他利是解放的鹿母，
生可愛的鹿仔子。 |
| 49:22 | 「約瑟親像水泉邊的野驢，
親像山崙仔頂的野馬。 |
| 49:23 | 射箭的人猛烈攻擊伊，
用箭射伊，追趇伊； |
| 49:24 | 毋拘伊倚靠雅各的大能者，
伊的弓猶原緊； 伊倚靠以色列的牧者及石磐， 伊的手猶有力。 |
| 49:25 | 你的老父的上帝欲幫贊你；
全能者欲賜福你。 伊欲賞賜你天頂的福氣， 深淵隱藏的福氣； 互你子孫真多，牲生興旺。 |
| 49:26 | 你的老父的祝福
贏過永遠山嶺的福氣， 超過自古以來的山崙仔的好物； 諸個福氣欲降落佇約瑟的頭殼， 臨到佇對兄弟中間揀選出來彼個人的身上。 |
| 49:27 | 「便雅憫是兇猛的豺狼；
早起時吞食伊的獵物， 下昏時分伊搶著的。」 |
| 49:28 | 諸個是以色列的十二支族；𪜶的老父照𪜶逐個人應該得著的福分給𪜶祝福。 |
| 49:29 | 雅各的死及埋葬 雅各吩咐伊的子，講：「我欲倒去我的列祖遐，恁著將我及我的祖先埋做夥，埋葬佇赫人以弗崙田野的洞穴； |
| 49:30 | 就是佇迦南地幔利的對面，麥比拉田野的洞穴，是亞伯拉罕對赫人以弗崙買來做墓地的產業。 |
| 49:31 | 佇遐有埋葬亞伯拉罕及伊的某莎拉，閣有埋葬以撒及伊的某麗百加；我嘛佇遐埋葬麗亞。 |
| 49:32 | 彼坵園及彼內面的洞穴是對赫人買的。」 |
| 49:33 | 雅各對伊許個子交代清楚了後，腳勼起來，倒佇眠床，氣就斷，倒去伊的祖先遐。 |