| 章節 | 現代台語漢字2021版經文 |
| 31:1 | 大闢的詩，交互聖樂長。 信靠的祈禱 上主啊，我靠你做我的保護。 求你互我永遠𣍐失敗見笑； 你是公義的上帝，求你解救我。 |
| 31:2 | 求你俯耳孔聽我，趕緊來救我，
做我堅固的石磐，做堡壘拯救我。 |
| 31:3 | 你是我的山巖，我的堡壘，
求你照你的名領導我，引導我。 |
| 31:4 | 人暗中設羅網欲網我，求你救我脫離，
因為你是我的堡壘。 |
| 31:5 | 我將我的靈魂交代你；
上主 — 信實的上帝啊，你會救贖我。 |
| 31:6 | 我厭惡擒牢無路用的偶像的人；
我只有信靠上主。 |
| 31:7 | 我欲因為你的慈愛歡喜快樂；
因為你有看見我的艱苦，知我內心的苦痛。 |
| 31:8 | 你無給我交佇對敵的手；
你互我的腳徛佇開闊安穩的所在。 |
| 31:9 | 上主啊，我佇患難中，求你憐憫我。
我的目睭因為憂傷花去； 我的心神，我的身軀衰弱。 |
| 31:10 | 我的性命因為憂苦消盡；
我的年歲因為哀傷減少。 我的氣力因為我的罪過衰荏； 我的骨頭枯焦。 |
| 31:11 | 我所有的對敵攏凌辱我；
我的厝邊給我侮辱； 連識我的人嘛攏驚我； 佇路裡看著我的人攏閃開。 |
| 31:12 | 我親像死人互人𣍐記得，無人數念；
我親像破去的器具互人挕拺。 |
| 31:13 | 我聽見真多人四界啲造謠；
周圍充滿恐怖。 𪜶參詳欲攻擊我， 計謀欲害我的性命。 |
| 31:14 | 上主啊，我猶久欲倚靠你；
我講：「你是我的上帝。」 |
| 31:15 | 我的一生佇你的手中；
求你救我脫離對敵的手及窘迫我的人。 |
| 31:16 | 求你用你的面的光照你的僕人，
照你的慈愛拯救我。 |
| 31:17 | 上主啊，求你互我無致到見笑，
因為我求叫你。 求你互歹人失敗見笑， 互𪜶佇陰府恬恬無話通講。 |
| 31:18 | 願你互白賊的嘴變啞口，
𣍐閣驕傲給人看輕，濫糝侮辱義人。 |
| 31:19 | 佇世間人面前，你為著敬畏你的人積聚的恩惠偌仔呢大！
你為著尋你做避難所的人所賜的恩惠偌仔呢好！ |
| 31:20 | 你給𪜶藏佇你的面前隱密的所在，
𪜶才免陷落人的陰謀。 你暗靜保守𪜶佇帳幕內， 𪜶才免受嘴舌的中傷。 |
| 31:21 | 上主應該受稱讚，
因為城受圍困的時，伊有對我顯出奇妙的疼。 |
| 31:22 | 我曾著急講「你給我趕走毋插我」，
毋拘我求叫的時，你有聽我懇求的聲。 |
| 31:23 | 上主聖的子民啊，恁攏著疼伊。
上主保守忠信的人， 嚴嚴報應驕傲的人。 |
| 31:24 | 所有仰望上主的人啊，
恁著壯膽，心堅固。 |