| 章節 | 現代台語漢字2021版經文 |
| 2:1 | 撒旦閣試探約伯 閣有一日，上帝的眾使者來徛佇上主的面前，撒旦嘛做夥來徛佇上主的面前。 |
| 2:2 | 上主對撒旦講：「你去叨位？」 撒旦應上主：「我佇地上四界行來行去。」 |
| 2:3 | 上主對撒旦講：「你有注意著我的僕人約伯無？世間無人親像伊赫呢純全正直，敬畏上帝，無做歹代。你雖然激我攻擊伊，無理由毀壞伊，伊猶久持守伊的純全正直。」 |
| 2:4 | 撒旦應上主：「用皮換皮！人會為著顧家己的性命甘願放拺伊的一切所有。 |
| 2:5 | 毋拘你若伸手磕著伊的骨、伊的肉，伊一定會當面給你咒詛。」 |
| 2:6 | 上主對撒旦講：「好，伊佇你的手頭，毋拘著留伊的性命。」 |
| 2:7 | 撒旦就對上主的面前出去，攻擊約伯，互伊對腳底到頭殼頂生毒瘡。 |
| 2:8 | 約伯就坐佇火灰頂，用破去的瓦片耙身軀。 |
| 2:9 | 伊的某對伊講：「你猶啲持守你的正直噢？著咒詛上帝，去死死咧。」 |
| 2:10 | 毋拘約伯對伊講：「你講話親像許個毋知見笑的查某人。咱對上帝得著福氣，豈無嘛對伊受災禍？」雖然抵著此個代誌，約伯猶原無講一句得罪上帝的話。 |
| 2:11 | 約伯的朋友來探伊 約伯三個朋友 — 提幔人以利法、書亞人比勒達、拿瑪人瑣法 — 聽著伊抵著諸個災禍，就相招對𪜶的所在來表示同情，給伊安慰。 |
| 2:12 | 𪜶遠遠看著約伯，𣍐認得，就大聲啼哭；逐個拆裂外衫，向天撒土粉佇家己的頭殼頂。 |
| 2:13 | 𪜶七暝七日及伊坐佇土腳，無及伊講一句話，因為𪜶看著伊所受的痛苦實在真大。 |