| 章節 | 現代台語漢字2021版經文 |
| 7:1 | 哈曼受處死 王及哈曼來赴王后以斯帖的宴席。 |
| 7:2 | 王佇第二日的酒宴閣問以斯帖，講：「王后以斯帖，你愛什麼，我會互你；你欲求什麼，就是王國的一半，我嘛欲互你。」 |
| 7:3 | 王后以斯帖應講：「王啊，我若得著王的恩惠，王若看做好，願你允准我的請求，救我的性命，救我的宗族； |
| 7:4 | 因為我及我的同胞受出賣，人欲給阮剿滅，給阮刣死，互阮完全滅亡。阮若干焦互人賣做奴隸，我嘛無話講；因為阮的災難𣍐造成王偌大的損失。毋拘阮欲互人消滅啦！」 |
| 7:5 | 亞哈隨魯王問王后以斯帖：「啥人敢做此款代誌？彼個人佇叨位？」 |
| 7:6 | 以斯帖應講：「迫害阮的對敵就是此個歹人哈曼。」 哈曼佇王及王后的面前驚甲皮皮惙。 |
| 7:7 | 王非常受氣，離開酒宴，入去王宮的花園。哈曼看會出王決定欲互伊死，就留啲，求王后以斯帖救伊一命。 |
| 7:8 | 王對王宮的花園倒轉來酒宴的所在，看著哈曼仆佇以斯帖的撐椅；王講：「伊竟然敢佇宮內，佇我的面前，凌辱王后！」王講了，人就蓋哈曼的面。 |
| 7:9 | 侍候王的太監哈波拿講：「哈曼佇𪜶兜𫞼一個二十二公尺高的柴架，欲將救王有功的末底改吊死。」 王就講：「給哈曼吊佇彼頂面。」 |
| 7:10 | 人就將哈曼吊佇伊欲吊末底改的柴架頂。王的受氣才煞。 |