| 章節 | 現代台語漢字2021版經文 |
| 6:1 | 王賜末底改榮譽 彼暝，王睏𣍐去，就叫人提伊在任的大事錄，讀互伊聽。 |
| 6:2 | 冊裡有記載講，王顧門的太監辟探及提列兩個人，計謀欲害亞哈隨魯王；末底改對王報告此個事。 |
| 6:3 | 王講：「末底改做此個事，我豈有賜伊什麼榮譽及地位？」 侍候王的人臣應講：「無賜伊什麼。」 |
| 6:4 | 王講：「什麼人佇埕裡？」 彼時哈曼入王宮外面的埕，欲求王將末底改吊佇伊𫞼好的柴架。 |
| 6:5 | 王的人臣應講：「哈曼徛佇埕裡。」 王講：「互伊入來。」 |
| 6:6 | 哈曼就入去；王問伊講：「王想欲賜榮譽互一個人，著按怎做？」 哈曼心內想講：「王欲賜榮譽互伊的人，當然是我囉！」 |
| 6:7 | 哈曼就應王講：「王欲賜榮譽互彼個人，著按呢對待伊： |
| 6:8 | 王著叫人將王所穿的袍帶來，將所騎戴花冠的馬牽來； |
| 6:9 | 託一個極尊貴的大臣，給彼個人穿王袍，互伊騎彼隻馬，踅城的廣場，閣佇伊的頭前喝講：『王欲賜伊榮譽的人，王會按呢對待伊。』」 |
| 6:10 | 王給哈曼講：「趕緊去，將王袍及馬帶來，照你所講的，對彼個坐佇王宮門前的猶太人末底改做諸個代誌；連一項都毋通減。」 |
| 6:11 | 哈曼就給末底改穿王袍，互伊騎馬，踅城的廣場，閣佇伊的頭前宣布講：「王欲賜伊榮譽的人，王會按呢對待伊。」 |
| 6:12 | 然後，末底改倒來王宮的門。哈曼憂悶，蓋頭，趕緊倒去𪜶兜。 |
| 6:13 | 哈曼將所發生的代誌攏給伊的某細利斯及伊的朋友講；伊許個參謀及伊的某細利斯給伊講：「你一旦對起頭就輸末底改，伊若真正是猶太人，你一定𣍐贏伊，會徹底失敗。」 |
| 6:14 | 𪜶猶啲講話的時，王的太監來，催哈曼趕緊去赴以斯帖所設的宴席。 |