| 章節 | 現代台語漢字2021版經文 |
| 4:1 | 末底改求以斯帖幫贊 末底改知此個代誌，就拆裂衫，穿麻衫，糝火灰，行入城，悲哀啼哭大聲哮， |
| 4:2 | 行到王宮門口就停啲，因為所有穿麻衫的人不准入王宮。 |
| 4:3 | 王的命令及詔書送到逐省逐所在，猶太人攏禁食、啼哭、哀叫、非常傷心；閣有真多人穿麻衫倒佇火灰。 |
| 4:4 | 王后以斯帖的宮女及伊的太監來給伊報告末底改的代誌。伊真艱苦心，就寄衣服互末底改穿，愛伊褪麻衫，毋拘末底改毋接受。 |
| 4:5 | 以斯帖就召王派來侍候伊的太監哈他革來，教伊去末底改遐，愛欲知伊哪欲按呢做。 |
| 4:6 | 哈他革就出去到王宮門前的廣場，去見末底改。 |
| 4:7 | 末底改就將所發生的事，以及哈曼為著剿滅猶太人願意捐獻佇王的府庫的銀確實的數目，攏給伊講； |
| 4:8 | 閣將公佈佇書珊城，欲剿滅猶太人詔書的抄本，提互伊交互以斯帖，續給以斯帖說明，閣吩咐伊入去見王，佇王的面前為家己的同胞懇切求情。 |
| 4:9 | 哈他革倒來，將末底改的話對以斯帖報告。 |
| 4:10 | 以斯帖閣吩咐哈他革對末底改講： |
| 4:11 | 「王的眾人臣及逐省的人民，攏知一個法令，若有人無受王召見，家己入宮內見王，無論男女，攏著處死；除了王有對伊伸出金柺，伊才免死。今我已經有三十日久無受王召見啦。」 |
| 4:12 | 𪜶就將以斯帖的話給末底改講。 |
| 4:13 | 末底改吩咐人給以斯帖講：「你毋通想講你佇王宮內比其他的猶太人較安全。 |
| 4:14 | 佇此款時陣你若恬恬毋講話，猶太人會對別位得著援助，得著解救；你及你的親族一定會滅亡。你會當做王后豈毋是為著今仔日此個危機？」 |
| 4:15 | 以斯帖就吩咐人回復末底改講： |
| 4:16 | 「你去，去招集書珊所有的猶太人，為著我禁食三暝三日，無食無飲；我及我的宮女嘛欲按呢禁食；然後我欲違背法令入去見王；我若著死，就死。」 |
| 4:17 | 末底改就照以斯帖的吩咐去做。 |