| 章節 | 現代台語漢字2021版經文 |
| 2:1 | 以斯帖做王后 諸個代誌以後，亞哈隨魯王的受氣煞，就想起華實蒂及伊的所做，以及家己按怎辦伊。 |
| 2:2 | 侍候王的人臣就參詳，欲為著王尋媠的在室女。 |
| 2:3 | 𪜶對王講：「請王派官員去全國逐省，尋所有媠的在室女；召集𪜶來書珊城的後宮，交互管理女子的太監希該，閣供給𪜶化妝品。 |
| 2:4 | 王合意的女子，通給伊設立做王后，代替華實蒂。」王歡喜此個建議，就按呢做。 |
| 2:5 | 書珊城有一個猶太人末底改，是便雅憫支族基士的曾孫，示每的孫，睚珥的子。 |
| 2:6 | 以前巴比倫王尼布甲尼撒對耶路撒冷掠猶大王約雅斤及人民去的時，末底改嘛佇許個流放的人中間。 |
| 2:7 | 末底改有一個叔伯小妹以斯帖，希伯來名哈大沙，父母已經過身；末底改收伊做家己的查某子，給伊養育。以斯帖的面貌媠，身材好看。 |
| 2:8 | 王的命令及法令已經宣布，就有真多女子送來書珊城，交互管理女子的希該。彼時以斯帖嘛受送入後宮，交互希該。 |
| 2:9 | 希該真合意以斯帖，好款待伊，趕緊將化妝品及應該得的食物互伊；閣對王宮選七個宮女給伊侍候；將伊及許個宮女徙去後宮上好的房間。 |
| 2:10 | 以斯帖聽末底改的吩咐，毋曾給人講伊的身世及宗族。 |
| 2:11 | 末底改逐日佇後宮的頭前行來行去，愛知以斯帖有平安抑無，以及伊按怎啲生活。 |
| 2:12 | 照規定，眾女子欲見亞哈隨魯王以前，著有一年的準備，就是六月日用沒藥的油，六月日用芳水及化妝品美容，才照次序一個一個入去見王。 |
| 2:13 | 女子對後宮入去王宮見王的時，伊愛什麼攏會互伊帶去； |
| 2:14 | 下昏時入去，隔早起就互人導去另外一個後宮，交互管理嬪妃的太監沙甲；若毋是王合意，閣提起伊的名召伊，就𣍐當閣入去見王。 |
| 2:15 | 輪到以斯帖著入去見王的時，管理女子的太監希該交互伊的物件以外，伊攏無討別項。所有看著以斯帖的人攏真謳咾伊；伊是末底改的阿叔亞比孩的查某子，互末底改收做查某子。 |
| 2:16 | 亞哈隨魯王第七年十月，就是提別月，以斯帖互人導入去王宮見王。 |
| 2:17 | 王愛以斯帖超過其他的女子；伊比其他的在室女閣較得著王的疼惜及恩惠。所以，王用后冠戴佇伊的頭殼，設立伊做王后代替華實蒂。 |
| 2:18 | 王用以斯帖的名辦大宴席邀請文武百官，宣布全國休假，閣慷慨送禮物。 |
| 2:19 | 末底改救王的性命 許個在室女第二遍聚集的時，末底改坐佇王宮的門。 |
| 2:20 | 以斯帖照末底改的吩咐，毋曾給人講伊的身世及宗族。以斯帖攏有聽末底改的話，及以前受伊養育的時像款。 |
| 2:21 | 有一日，末底改坐佇王宮的門執行職務的時，有兩個顧門的太監，辟探及提列，怨恨閣計謀欲害亞哈隨魯王。 |
| 2:22 | 末底改知此個代誌，就給王后以斯帖講；以斯帖就用末底改的名將此個事對王報告。 |
| 2:23 | 經過調查，證實有此個事，彼兩個人就互人吊死佇柴架頂。此個事有佇王的面前記入大事錄。 |