| 章節 | 現代台語漢字2021版經文 |
| 13:1 | 將外族人分開 彼日，有人讀摩西的律法書互人民聽，讀著內面有按呢記載：亞捫人及摩押人永遠𣍐用得加入上帝的會， |
| 13:2 | 因為𪜶毋若無用食物及水迎接以色列人，顛倒倩巴蘭去咒詛以色列人；毋拘咱的上帝互彼個咒詛變做祝福。 |
| 13:3 | 𪜶聽著此段律法了後，就將以色列人及許個有外族血統的人分開。 |
| 13:4 | 尼希米的改革 此個代誌以前，管理咱上帝聖殿府庫的祭司以利亞實，及亞捫人多比雅真有交情， |
| 13:5 | 就為著伊準備一間大間房。此間房間以前啲收囥素祭、乳香、聖殿的器具，以及照規定供給利未人、獻詩的、守衛的五穀、新酒，及新油的十分一，以及攑高獻互上主，歸互祭司的物。 |
| 13:6 | 此個代誌發生的時，我無佇耶路撒冷；因為巴比倫王亞達薛西三十二年，我倒去王遐；過無偌久我閣對王請假。 |
| 13:7 | 我到耶路撒冷才知以利亞實所做的歹代；伊為著多比雅佇上帝聖殿的埕準備一間房。 |
| 13:8 | 我就真受氣，將多比雅所有的家具攏㧒出去； |
| 13:9 | 閣命令人去潔淨房間，然後將上帝聖殿的器具、素祭，及乳香閣搬入去。 |
| 13:10 | 我嘛發見利未人應得的份額無互𪜶，當職的利未人及獻詩的煞著倒去家己的田園作穡。 |
| 13:11 | 我就責備許個官長，給𪜶講：「是按怎上帝的殿放互荒廢？」我就聚集利未人，互𪜶回復職務。 |
| 13:12 | 對按呢，猶大人民將五穀、新酒，及新油的十分一帶入府庫。 |
| 13:13 | 我指派祭司示利米雅，經學教師撒督，及利未人比大雅管理府庫；閣派瑪他尼的孫，撒刻的子哈難做助手。𪜶攏真忠實，盡職將物件分發互𪜶的同事。 |
| 13:14 | 我的上帝啊，求你記念我所做諸個事，毋通擦消我為著上帝的殿及服事伊所做的好事。 |
| 13:15 | 佇彼段期間，我佇猶大看著人佇安歇日踏酒窟，搬麥捆互驢載，閣佇安歇日將酒、葡萄、無花果，及逐款貨物運入去耶路撒冷；我就佇𪜶買賣彼日責備𪜶。 |
| 13:16 | 閣有住佇遐的泰爾人，帶魚及逐種貨物，佇安歇日，佇耶路撒冷賣互猶太人。 |
| 13:17 | 我就責備猶大許個貴族，給𪜶講：「恁是按怎做此款歹代誌干犯安歇日？ |
| 13:18 | 以前恁的祖先豈毋是嘛按呢做，互咱的上帝將這一切的災禍降落佇咱及此個城？現在恁猶久干犯安歇日，一定會互上帝對以色列發閣較大的受氣！」 |
| 13:19 | 佇安歇日開始，黃昏的時，我命令人關耶路撒冷的城門，到安歇日過去以前𣍐用得開。我派幾若個部下管理城門，才免有人佇安歇日擔貨物入城。 |
| 13:20 | 對按呢，生理人及販賣逐項貨物的人，有一兩遍佇耶路撒冷的城外過暝。 |
| 13:21 | 我就警告𪜶，講：「恁是按怎佇城牆外過暝？若閣按呢，我欲下手掠恁。」對彼時以後，𪜶佇安歇日就無閣來。 |
| 13:22 | 我命令利未人潔淨家己來顧守城門，互安歇日分別作聖。 我的上帝啊，求你記念我所做諸個事，照你豐盛的慈愛憐憫我。 |
| 13:23 | 佇彼段期間，我閣看著猶太人娶亞實突人、亞捫人、摩押人的查某子做某。 |
| 13:24 | 𪜶的子兒有一半講亞實突話，抑是別族的話，毋拘𣍐曉講猶大話。 |
| 13:25 | 我就責備𪜶，給𪜶咒詛，拍幾若個人，惙𪜶的頭毛，教𪜶指上帝咒誓，無欲閣將𪜶的查某子嫁互外族人的子，𪜶及𪜶的子嘛無欲娶外族人的查某子。 |
| 13:26 | 我給𪜶講：「以色列王所羅門豈毋是為著此款代誌犯罪？佇列國中，無一個王親像伊得著上帝的疼，閣得著上帝給伊設立做以色列全國的王；毋拘外族的某互伊犯罪。 |
| 13:27 | 按呢，阮哪通出在恁做此款嚴重的歹代，娶外族的女子，忤逆咱的上帝？」 |
| 13:28 | 大祭司以利亞實的孫，耶何耶大的子，有一個是和崙人參巴拉的子婿；我就將耶何耶大對我遮趕出去。 |
| 13:29 | 我的上帝啊，求你會記得𪜶所做的歹代；因為𪜶拍垃墋祭司的職務，違背利未人做祭司的的約。 |
| 13:30 | 按呢，我給𪜶潔淨，互𪜶脫離外族人一切的污穢，閣分派祭司及利未人的班次，互𪜶執行家己的職責， |
| 13:31 | 定期奉獻柴料及初熟的果子。 我的上帝啊，求你記念我，施恩互我。 |