| 章節 | 現代台語漢字2021版經文 |
| 9:1 | 以色列人認罪 仝彼月二四日，以色列人聚集禁食，穿麻衫，糝土粉。 |
| 9:2 | 以色列的後代及所有的外族人斷絕關係；𪜶攏徛啲認家己的罪，及𪜶列祖的罪過。 |
| 9:3 | 𪜶徛啲，用三點鐘讀上主 — 𪜶的上帝律法的冊，閣用三點鐘認罪，敬拜上主 — 𪜶的上帝。 |
| 9:4 | 利未人耶書亞、巴尼、甲篾、示巴尼、布尼、示利比、巴尼，及基拿尼徛佇台頂，大聲哀求上主 — 𪜶的上帝。 |
| 9:5 | 利未人耶書亞、甲篾、巴尼、哈沙尼、示利比、荷第雅、示巴尼、比他希雅講：
「著起來，稱讚上主 — 恁的上帝， 直到永永遠遠！ 上主啊，願你榮光的名得著謳咾， 超過一切的頌讚及謳咾。 |
| 9:6 | 「上主啊，只有你是上主！
你創造天、天頂的天，及天頂的萬象， 閣創造地及地上的萬物， 海及海中所有的； 你賞賜性命互萬物； 天軍嘛敬拜你。 |
| 9:7 | 你是主上帝，有揀選亞伯蘭，
導伊出巴比倫的吾珥， 給伊改名做亞伯拉罕。 |
| 9:8 | 你知伊對你忠實，
及伊立約， 應允將迦南人、赫人、亞摩利人、比利洗人、耶布斯人、革迦撒人的土地互伊的後代， 閣實現你的話； 因為你是公義的。 |
| 9:9 | 「你有看見阮的列祖佇埃及受苦，
聽見𪜶佇紅海海邊的哀求； |
| 9:10 | 你知埃及人壓迫阮的列祖；
你行神跡奇事，攻擊法老、伊的人臣，及伊國內的人民； 你就得著名聲，親像今仔日按呢。 |
| 9:11 | 你佇阮的列祖面前給海分開，
互𪜶對海中行焦地過去； 你將追趇𪜶的，㧒佇深海， 親像給石頭㧒落大湧。 |
| 9:12 | 日時你用雲柱導𪜶，
暝時你用火柱照光𪜶著行的路。 |
| 9:13 | 你降臨佇西奈山，
對天頂及𪜶講話， 賞賜𪜶正直的命令、 真實的律法、好的規例及誡命； |
| 9:14 | 你互𪜶知你安歇的聖日，
通過你的僕人摩西用誡命、規例，及律法教示𪜶。 |
| 9:15 | 「𪜶枵的時，你對天賞賜米糧；
𪜶嘴焦的時，你互石磐出水； 閣叫𪜶著去承接你立誓欲互𪜶的土地。 |
| 9:16 | 但是，阮的列祖驕傲自大，
硬心毋肯悔改，無聽趁你的誡命； |
| 9:17 | 𪜶毋肯順趁，
無記念你佇𪜶中間所做的奇事， 竟然硬心毋肯悔改，家己設立領袖， 存心背逆，想欲越倒去𪜶做奴才的地。 總是，你是歡喜赦免人， 有恩典，有憐憫， 無快受氣，有滿滿慈愛的上帝； 嘛無放拺𪜶。 |
| 9:18 | 𪜶雖然鑄一隻牛仔，講
『這是導恁出埃及的上帝』，按呢大大褻瀆你； |
| 9:19 | 毋拘你有極大的憐憫，
無放拺𪜶佇曠野； 日時，雲柱無離開𪜶，導𪜶行路； 暝時，火柱嘛無離開𪜶，照光𪜶著行的路。 |
| 9:20 | 你賞賜你良善的神來教示𪜶，
無收回你的嗎哪互𪜶無物件通食； 𪜶嘴焦的時，猶原賞賜𪜶有水通飲。 |
| 9:21 | 佇曠野四十年久你養飼𪜶，
互𪜶無欠半項； 𪜶的衫無破， 𪜶的腳無膨泡。 |
| 9:22 | 「你將列邦及許個人民交互𪜶，
將周圍的土地分互𪜶； 𪜶得著希實本王西宏的地 及巴珊王噩的地。 |
| 9:23 | 你互𪜶的子孫親像天頂的星赫呢多，
導𪜶到你應允𪜶列祖欲互𪜶承接的地。 |
| 9:24 | 𪜶的子孫入去承接彼個地，
你佇𪜶的面前制伏彼所在的住民迦南人， 將彼個地的君王及住民攏交佇𪜶的手， 出在𪜶的意思對待許個人。 |
| 9:25 | 𪜶攻取堅固的城、肥的土地，
得著囥滿逐款好物的厝宅，及開便便的水井、 葡萄園、橄欖園，及真多果子樹。 𪜶得著食飽，身軀肥； 因為你的大恩心內快樂。 |
| 9:26 | 「毋拘𪜶竟然毋順趁，背逆你，
將你的律法㧒佇尻脊後； 𪜶刣死苦勸𪜶歸向你的先知， 大大褻瀆你。 |
| 9:27 | 所以你將𪜶交佇對敵的手，互𪜶受苦楚；
𪜶抵著苦難的時哀求你， 你就對天頂俯落聽， 照你極大的憐憫，互𪜶有拯救者， 救𪜶脫離對敵的手。 |
| 9:28 | 𪜶享受太平，煞閣佇你的面前做歹；
你棄拺𪜶，給𪜶交佇對敵的手，受對敵管轄； 𪜶越倒轉求叫你的時， 你猶原對天頂俯落聽， 照你的憐憫一遍閣一遍解救𪜶。 |
| 9:29 | 你勸戒𪜶，愛𪜶越轉順趁你的律法；
毋拘𪜶驕傲自大，毋聽趁你的誡命， 違背你的命令 — 人若遵行，就會得著活命 — 肩頭越走，硬心固執，毋肯聽趁。 |
| 9:30 | 你寬容𪜶真多年，
你的神通過你的先知勸戒𪜶， 𪜶猶原毋聽趁； 所以你將𪜶交佇列國人民的手。 |
| 9:31 | 毋拘照你極大的憐憫，你無消滅𪜶，無棄拺𪜶；
因為你是有恩典，有憐憫的上帝。 |
| 9:32 | 「今，阮的上帝啊，你是至大，有權能，通驚畏，守約施仁愛的上帝；
阮的君王、領袖、祭司、先知、列祖，及你的子民， 對亞述列王的時到今仔日所受一切的苦難，求你毋通看做小可。 |
| 9:33 | 你是公義，你的所做信實；
阮所做的攏是歹，所抵著的是罪該應得。 |
| 9:34 | 阮的君王、領袖、祭司、列祖攏無遵守你的律法，
毋聽趁你的誡命以及你勸戒的話。 |
| 9:35 | 𪜶佇𪜶家己的國家，享受你賜互𪜶的福氣，
住佇你所賞賜寬闊肥媠的地， 𪜶竟然無服事你，嘛無越轉離開家己的歹所行。 |
| 9:36 | 阮今仔日做奴隸！
你賞賜阮列祖此塊土地，互𪜶通享受果子及好物； 阮竟然佇遮做奴隸。 |
| 9:37 | 因為阮的罪，此個地出產的物攏歸佇列王；
你設立𪜶管轄阮， 出在𪜶的意思管轄阮的身軀及阮的牲生。 阮佇患難中真艱苦！」 |
| 9:38 | 會眾立約簽名 諸個代誌了後，阮慎重立約，寫做文書；阮的領袖、利未人及祭司，攏簽名蓋印。 |