| 章節 | 現代台語漢字2021版經文 |
| 8:1 | 流放倒轉來的人 下面是亞達薛西王在位的時，及我對巴比倫倒轉來的族長，及𪜶的家譜： |
| 8:2 | 非尼哈的後代有革順，以他瑪的後代有但以理，大闢的後代有哈突。 |
| 8:3 | 示迦尼的後代；巴錄的後代有撒迦利亞；及伊做夥轉來，照家譜算，有查甫人一百五十名。 |
| 8:4 | 巴哈‧摩押的後代有西拉希雅的子以利約乃；及伊做夥的，有查甫人兩百名。 |
| 8:5 | 薩土的後代有雅哈悉的子示迦尼；及伊做夥的，有查甫人三百名。 |
| 8:6 | 亞丁的後代有約拿單的子以別；及伊做夥的，有查甫人五十名。 |
| 8:7 | 以攔的後代有亞他利雅的子以賽亞；及伊做夥的，有查甫人七十名。 |
| 8:8 | 示法提雅的後代有米迦勒的子西巴第雅；及伊做夥的，有查甫人八十名。 |
| 8:9 | 約押的後代有耶歇的子俄巴底亞；及伊做夥的，有查甫人兩百十八名。 |
| 8:10 | 巴尼的後代有約細斐的子示羅密；及伊做夥的，有查甫人一百六十名。 |
| 8:11 | 比拜的後代有比拜的子撒迦利亞；及伊做夥的，有查甫人二十八名。 |
| 8:12 | 押甲的後代有哈加坦的子約哈難；及伊做夥的，有查甫人一百十名。 |
| 8:13 | 亞多尼干的後代較慢轉來的有以利法列、耶利、示瑪雅；及𪜶做夥的，有查甫人六十名。 |
| 8:14 | 比革瓦伊的後代有烏太及撒刻；及𪜶做夥的，有查甫人七十名。 |
| 8:15 | 以斯拉召集利未人 我召集諸個人來到彼條流入亞哈瓦城的河的河邊；阮佇遐紮營三日久。我巡視人民及祭司，毋拘無看著利未人。 |
| 8:16 | 我就差人去召許個領袖，就是以利以謝、亞利伊勒、示瑪雅、以利拿單、雅立、以利拿單、拿單、撒迦利亞、米書蘭；閣教師約雅立及以利拿單。 |
| 8:17 | 我差𪜶去迦西斐雅地區見彼所在的領袖易多，閣教𪜶著按怎對易多及伊的同事聖殿的工人講話，通互𪜶派人來咱的上帝的聖殿服事。 |
| 8:18 | 咱的上帝施恩幫贊阮，互𪜶佇以色列的曾孫，利未的孫，抹利的後代中，帶一個有才能的人示利比來；伊的子及伊的親族共十八人嘛做夥來。 |
| 8:19 | 閣帶哈沙比雅；及伊做夥的有米拉利的後代以賽亞、伊的親族，及𪜶的子，共二十人。 |
| 8:20 | 閣帶兩百二十個聖殿的工人；𪜶的名攏有登錄，𪜶的祖先受大闢及許個大臣指派來協助利未人。 |
| 8:21 | 宣布禁食祈禱 彼時，我佇亞哈瓦河河邊宣布禁食，通佇咱的上帝的面前刻苦謙卑，求上帝互阮、阮的囝仔，及阮一切所有的，攏一路平安。 |
| 8:22 | 我感覺請求皇帝派步兵馬兵一路保護阮，免受對敵的攻擊，是見笑的事，因為阮曾對皇帝講：「阮的上帝會施恩保護所有求叫伊的人，毋拘伊嘛會發大受氣攻擊棄拺伊的人。」 |
| 8:23 | 所以，阮為著此項事禁食，懇求阮的上帝；伊有聽阮的祈禱。 |
| 8:24 | 為聖殿奉獻 對按呢，我指派十二個祭司長，就是示利比、哈沙比雅，及𪜶十個親族， |
| 8:25 | 將皇帝及伊的參謀、官員，以及佇遐的以色列眾人奉獻互咱的上帝的聖殿，許個金、銀及器具，攏秤過，交互彼十二個祭司。 |
| 8:26 | 我秤過交互𪜶的，有銀二十二公噸、銀器七十公斤、金三千四百公斤， |
| 8:27 | 以及金碗二十塊，重八點四公斤；金熠熠的銅器兩塊，貴重親像金。 |
| 8:28 | 我對𪜶講：「恁已經聖化歸上主，諸個器具嘛攏聖化歸上主；諸個金銀是人民甘心獻互上主 — 恁列祖的上帝的。 |
| 8:29 | 恁著警醒顧守，一直到恁去到耶路撒冷上主聖殿的庫房，佇祭司長及利未人，以及以色列族長的面前秤過交互𪜶。」 |
| 8:30 | 對按呢，祭司及利未人將過秤的金銀及器具接過來，欲帶去耶路撒冷咱的上帝的殿。 |
| 8:31 | 轉去耶路撒冷 正月十二，阮對亞哈瓦的河邊出發，欲去耶路撒冷；阮的上帝一路保護阮，救阮脫離對敵及埋伏的人的攻擊。 |
| 8:32 | 阮到耶路撒冷，佇遐歇睏三日。 |
| 8:33 | 第四日，阮到上帝的殿，秤許個金銀及器具，交互祭司烏利亞的子米利末；及伊做夥的有非尼哈的子以利亞撒、利未人耶書亞的子約撒拔，及賓內的子挪亞底。 |
| 8:34 | 逐項物件攏算過，秤過，閣詳細記錄。 |
| 8:35 | 所有流放倒轉來的人攏獻燒化祭互以色列的上帝；𪜶為著以色列眾人獻牛十二隻、綿羊九十六隻、綿羊仔七十七隻；閣獻山羊十二隻來潔淨家己的罪。諸個攏做燒化祭獻互上主。 |
| 8:36 | 𪜶將皇帝的詔書交互伊的人臣及河西省的總督；許個官員就幫贊人民，供給上帝的聖殿。 |