| 章節 | 現代台語漢字2021版經文 |
| 36:1 | 猶大王約哈斯 ( 王下 23:30-35 ) 猶大人民佇耶路撒冷設立約西亞的子約哈斯作王，續接伊的老父。 |
| 36:2 | 約哈斯坐位的時二十三歲，佇耶路撒冷作王三月日久。 |
| 36:3 | 埃及王佇耶路撒冷廢除伊的王位，閣罰猶大國金三十四公斤，銀三千四百公斤。 |
| 36:4 | 埃及王設立約哈斯的兄哥以利亞敬做猶大及耶路撒冷的王，給伊改名做約雅敬。尼哥給約哈斯掠去埃及。 |
| 36:5 | 猶大王約雅敬 ( 王下 23:36-24:7 ) 約雅敬坐位的時二十五歲，佇耶路撒冷作王十一年；伊做上主 — 伊的上帝看做歹的事。 |
| 36:6 | 巴比倫王尼布甲尼撒上來攻打伊，用銅鍊給伊鍊啲，給伊掠去巴比倫。 |
| 36:7 | 尼布甲尼撒閣將上主殿內的器具運去巴比倫，下佇巴比倫伊的宮內。 |
| 36:8 | 約雅敬其他的事蹟，及伊所做可惡的事，以及人對伊的指責，攏記載佇《以色列及猶大列王史》。伊的子約雅斤續接伊作王。 |
| 36:9 | 猶大王約雅斤 ( 王下 24:8-17 ) 約雅斤坐位的時十八歲，佇耶路撒冷作王三個月閣十日；伊做上主看做歹的事。 |
| 36:10 | 隔轉年，尼布甲尼撒派人將伊及上主殿內許個寶貝的器具帶到巴比倫，然後設立伊的阿叔西底家做猶大及耶路撒冷的王。 |
| 36:11 | 猶大王西底家 ( 王下 24:18-20 耶 52:1-3 ) 西底家坐位的時二十一歲，佇耶路撒冷作王十一年。 |
| 36:12 | 伊做上主 — 伊的上帝看做歹的事；伊無謙卑聽趁先知耶利米所傳達上主的話。 |
| 36:13 | 耶路撒冷淪陷 ( 王下 25:1-21 耶 52:3-11 ) 尼布甲尼撒王曾強迫西底家指上帝咒誓對伊忠誠，毋拘西底家背叛伊。西底家固執硬心，毋肯歸向上主 — 以色列的上帝。 |
| 36:14 | 閣許個祭司長及人民嘛犯大罪，學外邦可惡的事，拍垃墋上主佇耶路撒冷分別作聖的聖殿。 |
| 36:15 | 上主 — 𪜶列祖的上帝憐憫伊的子民及伊徛起的所在，不斷派使者去伊的子民遐， |
| 36:16 | 毋拘𪜶恥笑上帝的使者，藐視伊的話，譏刺伊的先知，致到上主對伊的子民發大受氣，互𪜶無法度得著解救。 |
| 36:17 | 所以，上帝導巴比倫王來攻擊𪜶，佇聖殿用刀刣死少年人，無憐憫𪜶的少男及少女，老人及衰弱的；上帝將𪜶攏交佇巴比倫王的手。 |
| 36:18 | 巴比倫王閣將上帝殿內大細的器具及財寶，以及王及許個首領的財寶，攏帶去巴比倫。 |
| 36:19 | 𪜶閣燒上帝的聖殿，拆毀耶路撒冷的城牆，用火燒城內所有的宮殿，毀壞寶貝的器具。 |
| 36:20 | 所有無互人刣死的，攏受掠去巴比倫，做巴比倫王及伊的子孫的奴隸，直到波斯國興起。 |
| 36:21 | 此個事啲實現上主通過耶利米所講的話，土地欲荒廢得著安歇，到滿七十年。 |
| 36:22 | 塞魯士王准猶大人回鄉 ( 拉 1:1-4 ) 波斯皇帝塞魯士元年，上主為著欲實現伊通過耶利米的嘴所講的話，感動波斯皇帝塞魯士，互伊對全國頒布講： |
| 36:23 | 「波斯皇帝塞魯士按呢講：『上主 — 天頂的上帝將天下萬國賞賜我，閣指派我佇猶大的耶路撒冷為著伊起聖殿。恁中間所有做伊子民的通轉去。願上主 — 𪜶的上帝及𪜶同在。』」 |