| 章節 | 現代台語漢字2021版經文 |
| 35:1 | 約西亞守𨃟過節 ( 王下 23:21-23 ) 約西亞佇耶路撒冷守𨃟過節服事上主。正月十四，人民刣𨃟過節的羊仔。 |
| 35:2 | 王派祭司執行𪜶的職務，閣勉勵𪜶辦理上主聖殿的工作。 |
| 35:3 | 閣對許個聖化歸上主，教導以色列人的利未人講：「恁著將聖的約櫃下佇大闢的子以色列王所羅門所起的聖殿內面，毋免閣扛來扛去。今恁著服事上主 — 恁的上帝，及伊的子民以色列。 |
| 35:4 | 著照以色列王大闢及伊的子所羅門的規定，照恁的宗族、恁的班次準備好勢。 |
| 35:5 | 恁利未人著照宗族的房頭，分組的家庭，徛佇聖殿服務恁的兄弟。 |
| 35:6 | 著照上主通過摩西所傳的話，刣𨃟過節的羊羔，潔淨家己，為著恁的親族準備好勢。」 |
| 35:7 | 約西亞王對伊的產業提出綿羊仔及山羊仔共三萬隻，牛三千隻，互所有在場的人民做𨃟過節的祭物。 |
| 35:8 | 王的大臣嘛歡喜提供祭物互人民、祭司及利未人。管理上帝聖殿的希勒家、撒迦利亞、耶歇，用羊仔兩千六百隻、牛三百隻，互祭司做𨃟過節的祭物。 |
| 35:9 | 利未人的領袖歌楠雅，及伊兩個兄弟示瑪雅及拿坦業，以及哈沙比雅、耶利、約撒拔，用羊仔五千隻、牛五百隻，互利未人做𨃟過節的祭物。 |
| 35:10 | 按呢，服事的代誌攏準備好勢，照王的命令，祭司徛佇𪜶的位，利未人嘛照𪜶的班次徛啲。 |
| 35:11 | 利未人刣𨃟過節的羊仔，祭司對𪜶的手接血來灑；利未人給羊仔剝皮， |
| 35:12 | 將燒化祭的祭物照宗族的房頭分互人民，互𪜶照摩西的冊所寫的獻互上主。獻牛做祭物嘛是按呢做。 |
| 35:13 | 𪜶照規定，用火烘𨃟過節的羊仔，其他的祭物用鍋仔、鼎、盆煮；煮了後，趕緊分互人民。 |
| 35:14 | 以後，利未人才為家己及祭司準備肉，因為亞倫的後代做祭司的一直啲獻燒化祭及祭物的油到暗時。 |
| 35:15 | 亞薩的後代負責唱歌的人，照大闢、亞薩、希幔，及王的先見耶杜頓的規定，照𪜶的職位徛啲；顧門的守衛看守逐個門；𪜶毋免離開𪜶的職務，因為𪜶的親族利未人替𪜶準備祭物。 |
| 35:16 | 彼日，服事上主的代誌攏準備好勢，照約西亞王的命令守𨃟過節，佇上主的壇獻燒化祭。 |
| 35:17 | 彼時，在場的以色列人做夥守𨃟過節，閣守除酵節七日。 |
| 35:18 | 對先知撒母耳的時代以來，以色列毋曾即呢盛大守𨃟過節；以色列的列王嘛攏毋曾按呢守𨃟過節，親像約西亞、祭司及利未人，以及在場的猶大及以色列人，及耶路撒冷的住民按呢守節。 |
| 35:19 | 此遍的𨃟過節佇約西亞作王第十八年舉行。 |
| 35:20 | 約西亞死 ( 王下 23:28-30 ) 約西亞整修聖殿了後，埃及王尼哥上來，欲攻打幼發拉底河河邊的迦基米施。約西亞王出去迎戰。 |
| 35:21 | 尼哥派使者來見約西亞，講：「猶大王，我及你有什麼關係？我今仔日來毋是欲攻擊你，是欲攻擊及我交戰的國家；上帝命令我著趕緊做此個事。你毋通反對及我同在的上帝，才免伊給你毀滅。」 |
| 35:22 | 毋拘約西亞毋聽上帝通過尼哥所講的話，堅持欲及伊交戰。約西亞變裝來到米吉多平原，及尼哥交戰。 |
| 35:23 | 射箭的人射著約西亞王；王對伊的人臣講：「我受重傷啦！載我離開戰場。」 |
| 35:24 | 伊的人臣扶伊出彼台車，互伊坐第二台車，載伊倒去耶路撒冷；伊就死，人將伊安葬佇伊列祖的墓。猶大及耶路撒冷的人攏為著約西亞哀傷。 |
| 35:25 | 耶利米為著約西亞作哀歌；所有唱歌的男女到今仔日猶啲唱諸個哀歌記念約西亞；此個嘛成做以色列的慣例。諸個哀歌攏收集佇《哀歌集》。 |
| 35:26 | 約西亞其他的事蹟，包括伊對上主律法的忠誠， |
| 35:27 | 及伊一生所做的事，攏記載佇《以色列及猶大列王史》。 |