| 章節 | 現代台語漢字2021版經文 |
| 34:1 | 猶大王約西亞 ( 王下 22:1-2 ) 約西亞坐位的時八歲，佇耶路撒冷作王三十一年。 |
| 34:2 | 伊做上主看做好的事，行伊的祖先大闢的路，無偏左偏右。 |
| 34:3 | 約西亞掃除偶像崇拜 約西亞作王第八年，猶少年就尋求伊的祖先大闢的上帝；四年後，開始潔淨猶大及耶路撒冷，掃除山頭壇、亞舍拉柱像、雕刻的像，及鑄造的像。 |
| 34:4 | 人民照伊的命令毀壞巴力的壇，斬斷壇頂高高的香台；伊閣將亞舍拉柱像、雕刻的像，及鑄造的像拍碎，研做粉，撒佇許個曾獻祭互偶像的人的墓； |
| 34:5 | 將外邦神明的祭司的骨頭下佇𪜶的祭壇頂燒，用按呢潔淨猶大及耶路撒冷。 |
| 34:6 | 約西亞閣佇瑪拿西、以法蓮、西緬，及拿弗他利地區許個荒廢的城， |
| 34:7 | 拆毀祭壇，拍碎亞舍拉柱像及雕刻的像，研做粉，斬斷以色列逐所在的香台，就倒去耶路撒冷。 |
| 34:8 | 發見律法書 ( 王下 22:3-20 ) 約西亞作王第十八年，土地及聖殿潔淨了後，伊派亞薩利雅的子沙番、市長瑪西雅、約哈斯的子史官約亞，去整修上主 — 伊的上帝的殿。 |
| 34:9 | 𪜶就去見大祭司希勒家，將所有獻佇上帝聖殿的銀交互伊；諸個銀是聖殿門口的守衛利未人對瑪拿西、以法蓮，及以色列所有賰落來的人，以及猶大、便雅憫，及耶路撒冷的人民收來的。 |
| 34:10 | 𪜶將許個銀交互管理上主聖殿的人，互𪜶轉交上主殿內的工人，就是作木師傅及建築工人，去買拍好的石，做樑及柱的木材，通修理聖殿內面互許個猶大王損壞的所在。 |
| 34:11 | 併於上節 |
| 34:12 | 許個人做代誌誠實；監工的是利未人米拉利的子孫雅哈及俄巴底亞，督工的是哥轄的子孫撒迦利亞及米書蘭，閣有真𠢕奏樂的利未人。 |
| 34:13 | 𪜶管理許個運搬的工人，嘛監督所有做逐款工作的人；利未人有的做書記，做官員，及守衛。 |
| 34:14 | 𪜶將獻佇上主聖殿的銀搬出去的時，大祭司希勒家發見摩西所傳上主律法的冊。 |
| 34:15 | 希勒家對書記沙番講：「我佇上主聖殿內面發見一卷律法的冊。」希勒家將冊交互沙番。 |
| 34:16 | 沙番就帶此卷冊去王遐，給王報告講：「王交託你的僕人的工作，𪜶攏有啲做。 |
| 34:17 | 奉獻佇上主聖殿的銀攏摒出來，交互督工及工人。」 |
| 34:18 | 書記沙番閣對王講：「大祭司希勒家有提一卷冊互我。」沙番就佇王的面前大聲讀彼卷冊。 |
| 34:19 | 王聽著律法的話，就拆裂伊的衫。 |
| 34:20 | 王吩咐希勒家、沙番的子亞希甘、米迦的子亞伯頓、書記沙番，及王的人臣亞撒雅，講： |
| 34:21 | 「恁去，為我，為以色列及猶大留落來的人民，將所發見此卷冊的話請問上主。因為咱的祖先無遵守上主的話，無照此卷冊所記載的教示去做，所以上主對咱發大受氣。」 |
| 34:22 | 對按呢，希勒家及王所派的人做夥去見女先知戶勒大。伊是管理禮服彼個沙龍的某；沙龍是哈珥哈斯的孫，特瓦的子。戶勒大住佇耶路撒冷新的城區。𪜶給伊請教。 |
| 34:23 | 伊對𪜶講：「上主 — 以色列的上帝按呢講：『恁去回復差恁來見我的人，給伊講 |
| 34:24 | 上主按呢講：我欲照佇猶大王面前讀的冊所記載的咒詛，降災禍佇此個所在及遮的住民。 |
| 34:25 | 因為𪜶棄拺我，給別個神明燒香，用𪜶的所做激我受氣，所以我欲將大受氣摒落佇此個所在無煞。』 |
| 34:26 | 毋拘差恁來請問上主的猶大王，恁著按呢對伊講：『上主 — 以色列的上帝按呢講：你聽著 |
| 34:27 | 我對此個所在及遮的住民警告的話，你就懺悔，佇上帝面前謙卑，閣拆裂衫，佇我的面前啼哭，我有聽著。上主講： |
| 34:28 | 我欲互你平安離開世間，轉去你的列祖遐。你𣍐看著我所欲降落佇此所在及遮的住民一切的災禍。』」 𪜶就倒去，將諸個話對王回復。 |
| 34:29 | 約西亞的改革 ( 王下 23:1-20 ) 約西亞王派人召集猶大及耶路撒冷的眾長老。 |
| 34:30 | 王上去上主的殿；猶大眾人及耶路撒冷所有的住民、祭司、利未人，及所有的人民，無論大細，嘛攏上去。王就將佇上主殿內發見的約書一切的話讀互𪜶聽。 |
| 34:31 | 王徛佇伊的位，佇上主的面前立約，欲全心全意順趁上主，遵守伊的誡命、教示，及規例，實行此卷冊所寫立約的話。 |
| 34:32 | 伊互耶路撒冷及便雅憫所有的人民攏答應遵守此個約；耶路撒冷的住民就遵行𪜶及𪜶列祖的上帝所立的約。 |
| 34:33 | 約西亞將國內一切可惡的偶像除去，閣互所有的以色列人攏服事上主 — 𪜶的上帝。約西亞活啲的日，人民順趁上主 — 𪜶列祖的上帝，攏無偏離。 |