| 章節 | 現代台語漢字2021版經文 |
| 29:1 | 猶大王希西家 ( 王下 18:1-3 ) 希西家坐位的時二十五歲，佇耶路撒冷作王二十九年；伊的老母叫做亞比雅，是撒迦利亞的查某子。 |
| 29:2 | 希西家做上主看做好的事，照伊的祖先大闢一切的所做。 |
| 29:3 | 潔淨聖殿 希西家作王彼年的正月，伊開上主聖殿的門，進行整修的工作。 |
| 29:4 | 伊召集許個祭司及利未人來聖殿東旁的廣場， |
| 29:5 | 對𪜶講：「利未人，聽我講。恁著家己聖化歸上主，嘛著將上主 — 恁列祖的上帝的殿分別作聖，將聖殿所有的污穢摒清氣。 |
| 29:6 | 因為咱的祖先有犯罪，做上主 — 咱的上帝看做歹的事，棄拺伊，無致意上主徛起的所在。 |
| 29:7 | 𪜶閣關聖殿走廊的門，無點燈火，無佇聖所燒香，無獻燒化祭互上主 — 以色列的上帝。 |
| 29:8 | 所以上主的大受氣臨到猶大及耶路撒冷，互𪜶受人恥笑，互人驚惶，感覺恐怖，親像恁親目看著的按呢。 |
| 29:9 | 所以，咱的祖先互人刣死，咱的某子嘛互人掠去。 |
| 29:10 | 現在，我決定欲及上主 — 以色列的上帝立約，互伊無閣對咱發大受氣。 |
| 29:11 | 我的子啊，毋通閣放外外，因為上主有揀選恁徛佇伊的面前服事，對伊燒香獻祭。」 |
| 29:12 | 對按呢，下面諸個利未人攏起來：
哥轄宗族：亞瑪賽的子瑪哈及亞撒利雅的子約珥 米拉利宗族：亞伯底的子基士及耶哈利勒的子亞撒利雅 革順宗族：薪瑪的子約亞及約亞的子伊甸 |
| 29:13 | 以利撒反宗族：申利及耶利
亞薩宗族：撒迦利亞及瑪他尼 |
| 29:14 | 希幔宗族：耶歇及示每
耶杜頓宗族：示瑪雅及烏薛 |
| 29:15 | 𪜶招集𪜶的親族潔淨家己，照王的命令，根據上主的話，入去潔淨上主的殿。 |
| 29:16 | 祭司就入去潔淨上主的聖殿，將殿內所有污穢的物帶出去上主聖殿的埕；利未人搬諸個物去㧒佇汲淪溪谷。 |
| 29:17 | 潔淨聖殿的工作對正月初一開始，初八清到上主聖殿的走廊。𪜶閣用八日繼續潔淨上主的殿，到正月十六就完成。 |
| 29:18 | 重新奉獻聖殿 對按呢，利未人就去報告希西家王，講：「阮已經將上主歸間聖殿，獻燒化祭的祭壇及壇所有的器具，囥獻祭的餅的桌及所有的器具，攏潔淨完成。 |
| 29:19 | 亞哈斯作王犯罪的時所棄拺的器具，阮攏重新款好勢，聖化歸上主。現在攏排佇上主祭壇的頭前。」 |
| 29:20 | 希西家王透早起來，召集城內的領袖攏來上主的殿。 |
| 29:21 | 𪜶牽七隻牛、七隻綿羊、七隻羊羔、七隻山羊，欲為著國家、聖殿，及猶大人民獻做贖罪祭。王命令亞倫的後代許個祭司，將諸個牲生獻佇上主的祭壇。 |
| 29:22 | 祭司先刣牛，才刣綿羊，閣刣羊羔，將每一隻的血灑佇壇裡。 |
| 29:23 | 最後，𪜶將欲獻做贖罪祭的山羊，牽來王及會眾的面前；王及會眾就按手佇彼頂面。 |
| 29:24 | 祭司刣許個山羊，用𪜶的血做贖罪祭獻佇壇裡，為以色列眾人贖罪；按呢𪜶照王的命令為以色列眾人獻燒化祭及贖罪祭。 |
| 29:25 | 希西家照上主通過大闢王、王的先見迦得，及先知拿單的指示，就是照上主通過眾先知所吩咐的，派利未人提鈸、琴、瑟佇上主的殿。 |
| 29:26 | 利未人提大闢的樂器，祭司攑喇叭，做夥徛啲。 |
| 29:27 | 希西家命令佇祭壇獻燒化祭。燒化祭一下獻，𪜶就唱稱讚上主的歌，用喇叭，用以色列王大闢的樂器伴奏。 |
| 29:28 | 會眾攏敬拜，唱歌的吟詩，歕喇叭的伴奏，一直到獻燒化祭結束。 |
| 29:29 | 獻祭結束，王及所有在場的人攏向上主仆拜。 |
| 29:30 | 希西家王及許個領袖閣命令利未人，用大闢及先見亞薩的詩稱讚上主；𪜶就歡歡喜喜頌讚，俯頭敬拜上主。 |
| 29:31 | 希西家對會眾講：「恁已經聖化歸上主，著進前來，帶祭物及謝恩祭到上主的殿。」會眾就帶祭物及謝恩祭來；嘛有人甘心樂意帶燒化祭來。 |
| 29:32 | 會眾所獻的燒化祭有牛七十隻、綿羊一百隻、羊羔兩百隻，諸個攏做燒化祭獻互上主。 |
| 29:33 | 閣有分別作聖的物，牛六百隻、綿羊三千隻。 |
| 29:34 | 毋拘祭司傷少，𣍐當剝所有燒化祭牲生的皮，所以𪜶的親族利未人幫贊𪜶到獻祭的事結束，閣聽候許個祭司潔淨家己。(對潔淨家己的事，利未人比祭司較頂真。) |
| 29:35 | 燒化祭及平安祭的油，以及及燒化祭做夥獻的奠酒祭真多。按呢，上主殿內敬拜的事閣再回復。 |
| 29:36 | 希西家及全體人民攏真歡喜，因為上帝幫贊𪜶，互𪜶真緊完成此個事。 |