| 章節 | 現代台語漢字2021版經文 |
| 16:1 | 猶大及以色列交戰 ( 王上 15:17-22 ) 亞撒作王第三十六年，以色列王巴沙來攻擊猶大，修建拉瑪城，欲阻擋人佇猶大王亞撒遐出入。 |
| 16:2 | 亞撒就對上主聖殿及王宮的府庫提金銀，送互徛起佇大馬士革的敘利亞王便‧哈達，對伊講： |
| 16:3 | 「咱來結盟，親像你的老父曾及我的老父結盟。今我將金銀送你，請你廢除你及以色列王巴沙所立的約，互伊對猶大撤退。」 |
| 16:4 | 便‧哈達同意亞撒王的話，就派伊的軍長去攻擊以色列的城，攻破以雲、但、亞伯‧伯‧瑪迦，及拿弗他利所有囤積的城。 |
| 16:5 | 巴沙聽著此個消息，就停工無閣修建拉瑪。 |
| 16:6 | 對按呢，亞撒王導猶大人民，將巴沙用來欲修建拉瑪的石頭及柴料，搬去重建迦巴及米斯巴。 |
| 16:7 | 先見哈拿尼 彼時，先見哈拿尼來見猶大王亞撒，對伊講：「因為你倚靠敘利亞王，無倚靠上主 — 你的上帝，所以敘利亞王的軍兵會脫離你的手頭。 |
| 16:8 | 古實人及利比亞人的軍隊豈毋是真強大？𪜶的戰車及馬兵豈毋是真多？毋拘因為你倚靠上主，伊就將𪜶交佇你的手。 |
| 16:9 | 上主的目睭啲巡視全地；所有專心歸向伊的，伊會賞賜𪜶氣力。佇及敘利亞結盟此個代誌，你做了真戇；因為按呢，你以後不時會有戰爭。」 |
| 16:10 | 亞撒聽了非常受氣，就將先見關佇監裡。像時，亞撒嘛虐待一寡人民。 |
| 16:11 | 亞撒的死 ( 王上 15:23-24 ) 亞撒的事蹟，對頭到尾攏記載佇《猶大及以色列列王史》。 |
| 16:12 | 亞撒王第三十九年，伊的腳著病，症頭真傷重。破病的時伊無求上主，干焦尋醫生。 |
| 16:13 | 亞撒作王四十一年就死， |
| 16:14 | 安葬佇大闢城，伊為家己拍好的墓。人將伊下佇床枋；床枋頂囥真多照特別的方法調和的逐種芳料。人閣起真大的火記念伊。 |