| 章節 | 現代台語漢字2021版經文 |
| 14:1 | 亞撒王拍敗古實人 亞比雅轉去伊的列祖遐，人給伊安葬佇大闢城；伊的子亞撒續接伊作王。亞撒在位的時，全國太平十年久。 |
| 14:2 | 亞撒做上主 — 伊的上帝看做好，看做正直的事。 |
| 14:3 | 伊廢除外邦神明的壇及山頭壇，毀壞石柱，剉亞舍拉女神的柱像， |
| 14:4 | 閣命令猶大人尋求上主 — 𪜶列祖的上帝，遵趁伊的律法誡命； |
| 14:5 | 閣佇猶大逐個城廢除山頭壇及香台。佇亞撒治理的時，猶大國得著太平。 |
| 14:6 | 伊佇猶大起幾若座堅固的城，因為國家太平。佇彼幾年攏無戰爭，因為上主賜伊平安。 |
| 14:7 | 伊對猶大人講：「咱著來強化諸個城，四圍起牆及城樓，安城門及門閂。因為咱有尋求上主 — 咱的上帝，此塊土地猶是咱的；咱有求叫上主，伊就賜咱四境平安。」𪜶就修造諸個城，事事攏順利。 |
| 14:8 | 亞撒的軍兵，夯盾牌及槍的猶大人有三十萬，夯盾牌開弓的便雅憫人二十八萬；𪜶攏是強猛的勇士。 |
| 14:9 | 古實王謝拉導軍兵一百萬，戰車三百台，來攻擊猶大；𪜶來到瑪利沙。 |
| 14:10 | 亞撒出去迎戰，雙方佇瑪利沙的洗法山谷排陣。 |
| 14:11 | 亞撒求叫上主 — 伊的上帝講：「上主啊，你會當幫贊弱小的，嘛會當幫贊強大的。上主 — 阮的上帝啊，求你幫贊阮，因為阮倚靠你，閣奉你的名欲及許個強大的軍隊交戰。上主，你是阮的上帝，毋通互人較贏你。」 |
| 14:12 | 上主就拍古實人，互𪜶對亞撒及猶大人的面前逃走。 |
| 14:13 | 亞撒及伊的軍兵追趇𪜶，直到基拉耳；古實人死傷真多，軍力𣍐當閣復原，因為𪜶互上主及伊的軍隊完全拍敗。猶大人得著真多戰利品。 |
| 14:14 | 𪜶閣攻打基拉耳周圍的城，因為許個城的人攏真驚上主。猶大的軍隊搶遐所有的城，因為城內財物真多。 |
| 14:15 | 𪜶破壞牲生的椆，搶真多羊及駱駝，就倒去耶路撒冷。 |