| 章節 | 現代台語漢字2021版經文 |
| 11:1 | 示瑪雅的預言 ( 王上 12:21-24 ) 羅波安到耶路撒冷，就聚集猶大家及便雅憫支族特選的戰士，共十八萬人，欲及以色列家交戰，互歸個王國閣歸屬伊家己。 |
| 11:2 | 毋拘上主的話臨到上帝重用的人示瑪雅，講： |
| 11:3 | 「你去給所羅門的子猶大王羅波安，猶大及便雅憫的人民，講： |
| 11:4 | 『上主按呢講：恁毋通去及恁的兄弟交戰；逐個人倒去家己的厝，因為此個代誌出佇我。』」𪜶就聽趁上主的話倒去，無去攻擊耶羅波安。 |
| 11:5 | 羅波安起堅固的城 羅波安住佇耶路撒冷。伊佇猶大地起幾若個堅固的城， |
| 11:6 | 就是伯利恆、以坦、提哥亞、 |
| 11:7 | 伯‧夙、梭哥、亞杜蘭、 |
| 11:8 | 迦特、瑪利沙、西弗、 |
| 11:9 | 亞多萊音、拉吉、亞西加、 |
| 11:10 | 瑣拉、亞雅崙，及希伯崙；諸個攏是猶大及便雅憫堅固的城。 |
| 11:11 | 羅波安閣強化許個堅固的城，設指揮官，囤積糧食、橄欖油，及酒； |
| 11:12 | 閣準備盾牌及槍，互諸個城閣較堅固。猶大及便雅憫攏受伊統治。 |
| 11:13 | 祭司及利未人歸猶大 以色列全地的祭司及利未人攏對逐所在來歸順羅波安。 |
| 11:14 | 利未人放棄𪜶的草埔及產業，來到猶大及耶路撒冷，因為耶羅波安及伊許個子毋准𪜶執行祭司的職務，服事上主。 |
| 11:15 | 耶羅波安為山頭壇、山羊鬼，及伊所造的牛仔像，家己設立祭司。 |
| 11:16 | 以色列各支族，所有決心欲尋求上主 — 以色列的上帝的人，攏隨利未人去耶路撒冷，欲獻祭互上主 — 𪜶列祖的上帝。 |
| 11:17 | 按呢，𪜶互猶大國穩固；三年久擁護所羅門的子羅波安，因為𪜶遵行大闢及所羅門的路三年久。 |
| 11:18 | 羅波安的家庭 羅波安娶瑪哈拉做某；瑪哈拉的老父是大闢的子耶利摩，老母是耶西的查某孫，以利押的查某子亞比孩。 |
| 11:19 | 瑪哈拉生三個子，耶烏施、示瑪利雅，及撒罕。 |
| 11:20 | 後來羅波安閣娶押沙龍的查某子瑪迦做某；伊生四個子，亞比雅、亞太、細撒，及示羅密。 |
| 11:21 | 羅波安有十八個某，六十個妃，生二十八個子，六十個查某子；佇諸個某及妃的中間，伊上疼押沙龍的查某子瑪迦。 |
| 11:22 | 羅波安設立瑪迦的子亞比雅做太子，佇伊的兄弟中做頭，欲設立伊續接作王。 |
| 11:23 | 羅波安做事精明，分派伊所有的子去猶大及便雅憫全地逐個堅固的城；閣互𪜶充足的糧食，給𪜶娶真多某。 |