| 章節 | 現代台語漢字2021版經文 |
| 4:1 | 聖殿的器具 ( 王上 7:23-51 ) 所羅門閣造一座銅壇，長九公尺，闊九公尺，高四公尺半。 |
| 4:2 | 閣鑄一個圓形的銅海，深兩公尺二十公分；直徑四公尺四十公分，周圍十三公尺二十公分。 |
| 4:3 | 銅海的唇下面有兩排牛圍啲，每四十五公分十隻，是鑄銅海的時像時鑄的。 |
| 4:4 | 銅海安佇十二隻銅牛的頂面，三隻向北，三隻向西，三隻向南，三隻向東；牛尾向內面。 |
| 4:5 | 銅海的厚度七公分半；伊的唇親像杯的唇，形親像百合花；會當貯六萬公升。 |
| 4:6 | 閣造十個盆，五個下佇南旁，五個佇北旁，內面通洗獻燒化祭的物。銅海干焦互祭司洗盪。 |
| 4:7 | 閣照規定的款式造十個金燈台，下佇殿內，五個佇正旁，五個佇倒旁； |
| 4:8 | 閣造十塊桌下佇殿內，五塊佇正旁，五塊佇倒旁；閣造一百塊金碗。 |
| 4:9 | 閣造祭司埕，嘛造大埕，以及大埕的門；門扇用銅包啲。 |
| 4:10 | 銅海下佇聖殿的東南旁。 |
| 4:11 | 戶蘭閣造盆、托仔，及碗。按呢，戶蘭為著所羅門王完成上帝聖殿一切的工。 |
| 4:12 | 伊所造的有：
兩支柱、柱頂碗形的柱斗、蓋碗形柱斗的網仔； |
| 4:13 | 四百粒石榴，分做兩旁，一旁兩排，安佇兩領蓋碗形柱斗的網仔；
|
| 4:14 | 盆座及座頂的盆；
|
| 4:15 | 一座銅海，銅海下面十二隻牛；
|
| 4:16 | 盆、托仔，及肉叉； 以上諸個器具攏是師傅戶蘭為著所羅門王起上主聖殿用光亮的銅做的。 |
| 4:17 | 諸個器具是王佇約旦平原，用疏割及撒拉旦中間的黏土做模鑄造的。 |
| 4:18 | 所羅門造的器具非常多，銅的重量無法度計算。 |
| 4:19 | 所羅門閣造上帝殿內所有的器具：金壇、排獻祭的餅的桌、 |
| 4:20 | 𫞼佇至聖所頭前，照規例點𤏸的純金燈台及燈； |
| 4:21 | 純金做的燈台的花、燈，及鑷仔； |
| 4:22 | 純金做的燈心的剪刀、盤、囥香的𥐵仔，及囥火炭的盆；閣有聖殿的門，就是至聖所的門及前殿的門，攏用金包啲。 |