| 章節 | 現代台語漢字2021版經文 |
| 22:1 | 大闢講：「主上帝的聖殿欲起佇遮；以色列人欲佇遮獻燒化祭。」 |
| 22:2 | 準備起聖殿 大闢下令召集住佇以色列地的外國人，閣派𪜶的拍石師傅去拍石，為著欲起上帝的殿。 |
| 22:3 | 大闢準備真多鐵，做門扇的鐵釘及門鈕；閣準備多甲𣍐秤得的銅。 |
| 22:4 | 伊嘛有算𣍐了的柏香柴，因為西頓人及泰爾人載真多柏香柴互大闢。 |
| 22:5 | 大闢想：「我的子所羅門猶少年無經驗；上主的聖殿著起真堂皇，互伊的名聲榮耀透到萬國。所以，我欲為著此個殿準備。」大闢就佇猶未死以前準備真多材料。 |
| 22:6 | 大闢叫伊的子所羅門來，交代伊著為上主 — 以色列的上帝起聖殿。 |
| 22:7 | 大闢給所羅門講：「我的子，我本來想欲為上主 — 我的上帝的名起聖殿， |
| 22:8 | 毋拘上主給我講：『你不時交戰，刣死真多人，流真多人的血；你毋通為著我的名起聖殿，因為我有看著你流真多人的血佇地裡。 |
| 22:9 | 毋拘，你會生一個子，我欲互伊一生太平，無受四圍對敵侵犯。伊的名欲叫做所羅門；佇伊統治的時，我欲互以色列國泰民安。 |
| 22:10 | 伊欲為著我的名起聖殿。伊欲做我的子，我欲做伊的父。我欲堅立伊的國權，互伊永遠統治以色列。』」 |
| 22:11 | 大闢閣講：「我的子，願上主及你同在，互你順利亨通，照伊給你應允的，起上主 — 你的上帝的聖殿。 |
| 22:12 | 願上主賜你聰明智慧，遵趁上主 — 你的上帝的律法來治理以色列。 |
| 22:13 | 你若謹慎遵趁上主通過摩西教示以色列的規例及命令，就會亨通；你著堅強勇敢，毋通驚，毋通懍。 |
| 22:14 | 我辛辛苦苦為上主的殿準備金三千四百公噸，銀三萬四千公噸，多甲𣍐秤得的銅及鐵，閣有石及木材；諸個以外你通閣加添。 |
| 22:15 | 你嘛有真多師傅：拍石的、土水的、作木的，以及真多𠢕用金、銀、銅、鐵做逐款工藝的師傅。你著起來開始做工。願上主及你同在！」 |
| 22:16 | 併於上節 |
| 22:17 | 大闢閣命令以色列所有的官員幫贊伊的子所羅門，講： |
| 22:18 | 「上主 — 恁的上帝豈無及恁同在？豈無互恁國境平安？上主已經將此個地的住民交互我治理，此個地及住民嘛歸順上主及伊的子民。 |
| 22:19 | 今恁著全心全情尋求上主 — 恁的上帝，閣著起來起造主上帝的聖所，通將上主的約櫃及上帝聖的器具，搬入奉上主的名欲起造的聖殿。」 |