| 章節 | 現代台語漢字2021版經文 |
| 21:1 | 大闢調查戶口 ( 撒下 24:1-17 ) 撒旦起來攻擊以色列人，激動大闢調查以色列人的人口。 |
| 21:2 | 大闢對約押及軍隊的領袖講：「恁對別是巴到但點算以色列人的人口，互我知全國人民的數目。」 |
| 21:3 | 約押講：「願上主互伊的子民比現在增加百倍。我的主我的王，𪜶豈毋是我的主的人民？我的主是按怎愛欲做此個代誌？是按怎欲互以色列陷落罪？」 |
| 21:4 | 王堅持伊的命令。約押就行透以色列全國調查，後來倒來耶路撒冷。 |
| 21:5 | 約押將點算的人數報告大闢。以色列人攑刀的戰士有一百十萬，猶大人有四十七萬。 |
| 21:6 | 毋拘約押無點算利未支族及便雅憫支族的人數，因為伊厭惡王此個命令。 |
| 21:7 | 大闢做的此項代誌上帝看做歹，就刑罰以色列。 |
| 21:8 | 大闢對上帝講：「我做此個代誌犯真大的罪。求你除去你奴僕的罪，因為我按呢做真戇。」 |
| 21:9 | 上主吩咐大闢的先見迦得，講： |
| 21:10 | 「你去給大闢講：上主按呢講：『我用三項災禍互你揀一項，我就照按呢做。』」 |
| 21:11 | 迦得來給大闢講：「上主按呢講：『你家己揀： |
| 21:12 | 三年的飢荒；抑是刣輸對敵，互對敵追殺三個月；抑是三日久互上主用伊的劍，就是瘟疫，降臨佇以色列全國，施行毀滅。』今你著想，互我通回復差我來彼位。」 |
| 21:13 | 大闢給迦得講：「我真為難；我寧可互上主家己給我刑罰，因為伊有豐盛的憐憫；我毋願陷落佇人的手。」 |
| 21:14 | 上主就降瘟疫佇以色列；以色列死七萬人。 |
| 21:15 | 上帝差一個天使去耶路撒冷欲給伊毀滅。當天使欲毀滅的時，上主看見就改變心意，無欲繼續降此個災禍，就給啲執行毀滅的天使講：「停手！夠額啦！」彼時，上主的使者徛佇耶布斯人亞勞拿的五穀場。 |
| 21:16 | 大闢攑頭看見上主的使者徛佇半空中，手攑拔出的劍，指向耶路撒冷。大闢及長老攏穿麻衫，面仆佇土腳。 |
| 21:17 | 大闢對上帝講：「下令調查戶口的豈毋是我？犯罪做此個歹代誌的是我，諸個無辜的人民攏無做什麼毋著。求上主 — 我的上帝的手刑罰我及我的家族，毋通降瘟疫攻擊你的子民。」 |
| 21:18 | 大闢為上主起一座祭壇 ( 撒下 24:18-25 ) 上主的使者吩咐迦得，叫大闢上去耶布斯人亞勞拿的五穀場，佇遐為上主起一座祭壇。 |
| 21:19 | 大闢就照迦得奉上主的名所講的話上去。 |
| 21:20 | 彼時亞勞拿啲拍麥，越頭看見天使；及伊做夥佇遐的四個子走去匿。 |
| 21:21 | 大闢去到亞勞拿遐；亞勞拿看著大闢，就對五穀場出來迎接，仆佇土腳拜大闢。 |
| 21:22 | 大闢對亞勞拿講：「請你將此個五穀場賣我，互我通佇遮為上主起一座祭壇，互全國的瘟疫停止。我會用全額的價錢給你買。」 |
| 21:23 | 亞勞拿對大闢講：「我的主我的王，請你提去用，照你看做好的去做。我用牛互你做燒化祭，用拍五穀的器具做柴燒，麥仔做素祭；諸個我攏送互王。」 |
| 21:24 | 大闢王對亞勞拿講：「毋通，我一定欲用全額的價錢給你買。我𣍐用得提你的物獻互上主，用白白得著的物獻做燒化祭。」 |
| 21:25 | 大闢就用六千八百公克的黃金給亞勞拿買彼塊地。 |
| 21:26 | 大闢佇遐為上主起一座祭壇，獻燒化祭及平安祭，閣求叫上主。上主聽伊的祈禱，對天降火燒祭壇的祭物。 |
| 21:27 | 上主命令彼個使者，伊就將劍收起來。 |
| 21:28 | 大闢看著上主有佇耶布斯人亞勞拿的五穀場聽伊的祈禱，就佇遐獻祭。 |
| 21:29 | 摩西佇曠野所造上主的會幕及燒化祭的祭壇，彼個時陣攏佇基遍的山頭壇。 |
| 21:30 | 毋拘大闢毋敢去基遍求問上帝，因為驚上主使者的劍。 |