| 章節 | 現代台語漢字2021版經文 |
| 18:1 | 上主互大闢得勝 ( 撒下 8:1-18 ) 後來，大闢攻擊非利士人，互𪜶降服；閣對非利士人的手取著迦特及附近的庄社。 |
| 18:2 | 大闢閣拍敗摩押人，摩押人就歸順大闢，閣進貢。 |
| 18:3 | 瑣巴王哈大底謝去幼發拉底河，欲堅固伊的統治權的時，大闢攻擊伊，直到哈馬。 |
| 18:4 | 大闢搶伊的戰車一千台、馬兵七千、步兵兩萬，閣斬斷戰車的馬的腳筋；只有留夠額通拖一百台戰車的馬。 |
| 18:5 | 大馬士革的敘利亞人來幫贊瑣巴王哈大底謝，大闢就刣死敘利亞人兩萬兩千。 |
| 18:6 | 對按呢，大闢佇大馬士革的敘利亞設立軍營。敘利亞人就歸順大闢，閣進貢。大闢無論去叨位，上主攏互伊得勝。 |
| 18:7 | 大闢將哈大底謝的部下所用金的盾牌攏帶來耶路撒冷。 |
| 18:8 | 大闢王閣對哈大底謝的城提巴及均，提真多銅。後來，所羅門用諸個造銅海、銅柱，及所有的銅器。 |
| 18:9 | 哈馬王陀以聽見大闢拍贏哈大底謝的全軍， |
| 18:10 | 就差伊的子約蘭帶金器、銀器、銅器去見大闢王，給伊請安，祝賀伊拍贏哈大底謝，因為哈大底謝及陀以常常交戰。 |
| 18:11 | 大闢王就將諸個物，及以前伊刣贏列國所得著的金銀，就是對以東、摩押、亞捫人、非利士人、亞瑪力人得著的，攏聖化獻互上主。 |
| 18:12 | 洗璐雅的子亞比篩佇鹽的山谷拍死以東人一萬八千。 |
| 18:13 | 大闢佇以東全地設軍營；以東人攏歸順伊。大闢無論去叨位，上主攏互伊勝利。 |
| 18:14 | 大闢做全以色列的王，用公平正義治理伊所有的人民。 |
| 18:15 | 洗璐雅的子約押做元帥，亞希律的子約沙法做史官。 |
| 18:16 | 亞希突的子撒督及亞比亞他的子亞希米勒做祭司；西萊雅做書記。 |
| 18:17 | 耶何耶大的子比拿雅作頭指揮基利提人及比利提人。大闢的子攏做王室參謀。 |