| 章節 | 現代台語漢字2021版經文 |
| 16:1 | 諸個利未人扛上帝的約櫃入去，下佇大闢為著約櫃搭的布棚內面，閣佇上帝的面前獻燒化祭及平安祭。 |
| 16:2 | 大闢獻燒化祭及平安祭了後，就奉上主的名給人民祝福。 |
| 16:3 | 伊閣分物件互以色列眾人，無論男女，逐個人一塊餅，一塊肉，一粒葡萄乾丸。 |
| 16:4 | 大闢派幾若個利未人佇上主的約櫃前服事，來懇求，感謝，稱讚上主 — 以色列的上帝。 |
| 16:5 | 隊長是亞薩，副隊長是撒迦利亞，閣有雅薛、示米拉末、耶歇、瑪他提雅、以利押、比拿雅、俄別‧以東、耶利，彈琴彈瑟；亞薩拍鈸伴奏。 |
| 16:6 | 祭司比拿雅及雅哈悉佇上帝的約櫃前照時歕喇叭。 |
| 16:7 | 彼日，大闢第一遍指派亞薩及伊的親族感謝上主。 |
| 16:8 | 頌讚的歌 ( 詩 105:1-15 96:1-13 106:1, 47-48 ) 恁著感謝上主，求叫伊的名， 佇萬民中報揚伊的作為。 |
| 16:9 | 著對伊吟詩，向伊唱歌謳咾，
談論伊一切奇妙的所做。 |
| 16:10 | 著誇耀伊的聖名。
願尋求上主的人心內歡喜。 |
| 16:11 | 著倚靠上主及伊的權能，
不時尋求見伊的面。 |
| 16:12 | 伊的僕人以色列的後代，
伊所揀雅各的子孫啊， 恁著數念伊奇妙的作為， 數念伊的神跡及伊所講判斷的話。 |
| 16:13 | 併於上節 |
| 16:14 | 伊是上主 — 咱的上帝；
伊的審判普及全地。 |
| 16:15 | 著會記得伊的約直到永遠，
伊的應允直到萬代。 |
| 16:16 | 著會記得伊及亞伯拉罕立的約，
對以撒所立的誓。 |
| 16:17 | 伊將此個約互雅各做規例，
互以色列做永遠的約。 |
| 16:18 | 伊講：「我欲將迦南地賜互你，
做你應得的產業。」 |
| 16:19 | 當時𪜶的人口有限，人數真少；
𪜶佇遐做出外人。 |
| 16:20 | 𪜶對此族行到彼族，
對此國到彼國。 |
| 16:21 | 伊無容允人壓迫𪜶；
為著𪜶的緣故，伊譴責許個君王。 |
| 16:22 | 伊講：「毋通磕著我揀選的僕人，
嘛毋通欺負我的先知。」 |
| 16:23 | 全地攏著對上主唱歌！
著日日宣布伊拯救的好消息！ |
| 16:24 | 著對萬國宣揚伊的榮耀！
著對萬民講起伊偉大的作為！ |
| 16:25 | 因為上主至大，應該受極大的稱讚；
伊比所有的神明應該閣較受敬畏。 |
| 16:26 | 因為外邦的神明不過是偶像；
毋拘上主創造諸個天。 |
| 16:27 | 尊貴及威嚴包圍伊；
權能及喜樂充滿伊的所在。 |
| 16:28 | 地上萬民攏著稱讚上主！
著將榮耀及權能歸互伊！ |
| 16:29 | 著將上主應得的榮耀歸互伊！
著帶祭物來到伊的面前！ 著穿聖潔做禮服敬拜上主！ |
| 16:30 | 全地著佇伊面前驚惶皮皮惙！
世界堅固𣍐動搖； |
| 16:31 | 天著歡喜，地著快樂！
著對萬國宣布：「上主作王！」 |
| 16:32 | 海及彼內面的活物攏著出大聲！
田園及其中所有的攏著快樂！ |
| 16:33 | 彼時，樹林內的樹木攏欲佇上主面前歡喜唱歌，
因為伊欲來審判普天下。 |
| 16:34 | 著感謝上主，因為伊至善；
伊的慈愛續到永遠！ |
| 16:35 | 著講：「拯救阮的上帝啊，求你拯救阮，
聚集阮，救阮脫離列國， 互阮通感謝你的聖名， 用稱讚你做阮上大的歡喜。 |
| 16:36 | 願稱讚歸互上主 — 以色列的上帝，
對永遠到永遠。」 全體人民攏講「阿們！」閣稱讚上主。 |
| 16:37 | 佇耶路撒冷及基遍的敬拜 大闢留亞薩及伊的親族佇上主的約櫃前，照逐日應該做的工作，繼續佇約櫃前服事。 |
| 16:38 | 閣留俄別‧以東及伊的親族六十八人，以及耶杜頓的子俄別‧以東及何薩做約櫃的守衛。 |
| 16:39 | 閣留祭司撒督及伊的親族眾祭司，佇基遍山頭壇上主的會幕前， |
| 16:40 | 逐日早暗佇祭壇頂獻燒化祭互上主，攏照上主命令以色列人的律法所有的記載。 |
| 16:41 | 猶有希幔、耶杜頓，及其他受選，名有登錄的人，及𪜶做夥稱讚上主，因為伊的慈愛永遠存續。 |
| 16:42 | 希幔、耶杜頓及𪜶做夥用喇叭、鈸，及謳咾上帝的樂器稱讚上主；耶杜頓的後代做守衛。 |
| 16:43 | 後來，全體人民就倒去𪜶兜；大闢嘛倒去，給伊的家族祝福。 |