| 章節 | 現代台語漢字2021版經文 |
| 15:1 | 準備迎接約櫃 大闢佇大闢城為家己起幾若間宮殿，閣為上帝的約櫃準備所在，搭一個布棚。 |
| 15:2 | 彼時大闢講：「利未人以外，毋通有人扛上帝的約櫃，因為上主揀利未人扛伊的約櫃，閣永遠服事伊。」 |
| 15:3 | 大闢召集以色列眾人來耶路撒冷，欲將上主的約櫃扛來伊準備的所在。 |
| 15:4 | 大闢閣召集亞倫的後代及利未人：
|
| 15:5 | 哥轄的後代有首領烏列及伊的親族一百二十人。
|
| 15:6 | 米拉利的後代有首領亞撒雅及伊的親族兩百二十人。
|
| 15:7 | 革順的後代有首領約珥及伊的親族一百三十人。
|
| 15:8 | 以利撒反的後代有首領示瑪雅及伊的親族兩百人。
|
| 15:9 | 希伯崙的後代有首領以利業及伊的親族八十人。
|
| 15:10 | 烏薛的後代有首領亞米拿達及伊的親族一百十二人。 |
| 15:11 | 大闢召祭司撒督及亞比亞他，以及利未人烏列、亞撒雅、約珥、示瑪雅、以利業，及亞米拿達來。 |
| 15:12 | 對𪜶講：「恁是利未人的族長，恁及恁的親族著家己聖化歸上主，才通將上主 — 以色列的上帝的約櫃，扛來我為著伊準備的所在。 |
| 15:13 | 因為恁前彼遍無扛約櫃，咱嘛無照規矩求問伊，所以上主 — 咱的上帝受氣攻擊咱。」 |
| 15:14 | 對按呢祭司及利未人為著欲將上主 — 以色列的上帝的約櫃扛來，就家己聖化歸上主。 |
| 15:15 | 利未的子孫照上主吩咐摩西的命令，用槓扛上帝的約櫃佇肩頭頂。 |
| 15:16 | 大闢吩咐利未的族長分派𪜶的親族負責唱歌，用琴、瑟，及鈸奏樂，大聲歡喜唱歌。 |
| 15:17 | 利未人就派約珥的子希幔，伊的親成比利加的子亞薩，及𪜶的親族米拉利的子孫中古沙雅的子以探。 |
| 15:18 | 第二班有𪜶的親族撒迦利亞、雅薛、示米拉末、耶歇、烏尼、以利押、比拿雅、瑪西雅、瑪他提雅、以利斐利戶、彌克尼雅，以及顧門的俄別‧以東及耶利。 |
| 15:19 | 按呢派唱歌的希幔、亞薩、以探，拍鈸伴唱。 |
| 15:20 | 閣派撒迦利亞、雅薛、示米拉末、耶歇、烏尼、以利押、瑪西雅、比拿雅彈瑟，調用「少女」。 |
| 15:21 | 閣派瑪他提雅、以利斐利戶、彌克尼雅、俄別‧以東、耶利、亞撒西雅用琴指揮，調降八度。 |
| 15:22 | 利未人的首領基拿尼雅負責音樂；伊精通音樂，教人唱歌。 |
| 15:23 | 比利加及以利加拿是約櫃的守衛。 |
| 15:24 | 祭司示巴尼、約沙法、拿坦業、亞瑪賽、撒迦利亞、比拿雅、以利以謝，佇上帝的約櫃前歕喇叭。俄別‧以東及耶希亞嘛是約櫃的守衛。 |
| 15:25 | 約櫃遷入耶路撒冷 ( 撒下 6:12-22 ) 對按呢，大闢及以色列的長老、指揮官，攏去俄別‧以東的厝，歡歡喜喜將上主的約櫃對遐接來。 |
| 15:26 | 上帝幫贊扛約櫃的利未人，𪜶就獻公的牛七隻，公的羊七隻。 |
| 15:27 | 大闢及扛約櫃的利未人、負責音樂的基拿尼雅，以及唱歌的人攏穿幼麻布的長衫。大闢閣穿幼麻布的以弗得。 |
| 15:28 | 按呢，以色列眾人歡呼，歕哨角，歕喇叭，拍鈸，彈琴，彈瑟，扛上主的約櫃上來。 |
| 15:29 | 上主的約櫃入大闢城的時，掃羅的查某子米甲對窗仔看出去，看著大闢王亦跳亦趒，就看輕伊。 |