| 章節 | 現代台語漢字2021版經文 |
| 13:1 | 約櫃遷出基列‧耶琳 ( 撒下 6:1-11 ) 大闢及指揮官、軍官，以及所有的領袖參詳。 |
| 13:2 | 大闢對以色列全會眾講：「恁若看做好，閣是出佇上主 — 咱的上帝的意思，咱著派人去以色列全地，去見無佇咱遮的親族，以及住佇有草埔的城的祭司及利未人，互𪜶攏聚集來遮。 |
| 13:3 | 咱就通將咱的上帝的約櫃遷來遮；因為佇掃羅作王的時，咱無將約櫃看做要緊。」 |
| 13:4 | 全會眾攏同意按呢做；人民嘛看此個代誌做著。 |
| 13:5 | 大闢就對埃及邊界的西曷河，到哈馬隘口召集所有的以色列人，欲將上帝的約櫃對基列‧耶琳接來。 |
| 13:6 | 大闢及以色列眾人就去巴拉，就是屬猶大的基列‧耶琳，欲對遐將上帝的約櫃接來；此個櫃是奉坐佇兩個天使基路伯中間的上主的名稱呼的。 |
| 13:7 | 𪜶將上帝的約櫃下佇新的車，對亞比拿達的厝載出來；烏撒及亞希約趕彼台車。 |
| 13:8 | 大闢及以色列眾人佇上帝的面前盡力唱歌，用琴、瑟、鑼、鼓、喇叭，歡喜慶祝。 |
| 13:9 | 𪜶到基頓的五穀場，牛著觸，烏撒伸手給約櫃扶啲。 |
| 13:10 | 上主對烏撒發大受氣，因為伊伸手扶約櫃，就拍伊；伊就佇遐死佇上帝的面前。 |
| 13:11 | 大闢因為上主拍烏撒，真無歡喜，就將彼個所在號做比列斯‧烏撒，直到今仔日。 |
| 13:12 | 彼日，大闢驚上帝，就講：「我哪通將上帝的約櫃運來我的所在？」 |
| 13:13 | 對按呢，大闢無將約櫃遷入大闢城，到家己的所在，就給伊徙去迦特人俄別‧以東的厝。 |
| 13:14 | 上帝的約櫃停佇俄別‧以東的厝三月日久。上主賜福俄別‧以東的家及伊一切所有的。 |