| 章節 | 現代台語漢字2021版經文 |
| 34:1 | 底拿受侮辱 麗亞給雅各生的查某子底拿出去欲及彼所在的查某囝仔相尋。 |
| 34:2 | 彼所在的族長希未人哈抹的子示劍看著伊，就給伊扭啲，及伊睏，給伊侮辱。 |
| 34:3 | 示劍戀慕雅各的查某子底拿；伊愛此個查某囝仔，對伊吐露真情。 |
| 34:4 | 示劍給伊的老父哈抹講：「給我娶此個查某囝仔互我做某。」 |
| 34:5 | 雅各聽著伊的查某子底拿受示劍侮辱，靜靜無出聲，因為彼時伊許個子及牲生攏猶佇野地；伊欲聽候𪜶倒來。 |
| 34:6 | 示劍的老父哈抹來見雅各，欲及伊講關係底拿的代誌。 |
| 34:7 | 雅各許個子對野地倒來，一下聽著此個代誌，逐個非常痛心受氣，因為示劍對以色列家做毋應該做的見笑代，給雅各的查某子侮辱。 |
| 34:8 | 哈抹及𪜶參詳講：「我的子示劍戀慕恁查某子，請將伊互我的子作某。 |
| 34:9 | 恁及阮結親；恁通將恁的查某子嫁阮，恁嘛通娶阮的查某子。 |
| 34:10 | 恁及阮做夥住𫢶遮；土地即闊，恁通住佇遮，做生理，建置產業。」 |
| 34:11 | 示劍對查某囝仔的老父及伊的兄哥講：「恁若無棄嫌，恁要求什麼，阮攏欲互恁。 |
| 34:12 | 無論偌多聘金及禮物，阮一定照恁的要求互恁；只有請恁將查某子嫁互我。」 |
| 34:13 | 雅各許個子因為示劍侮辱𪜶的小妹底拿，就欺騙示劍及伊的老父哈抹， |
| 34:14 | 講：「將阮小妹嫁互無受割禮的人，此款代誌阮做𣍐到；因為這對阮來講是見笑事。 |
| 34:15 | 只有一個條件，恁所有的查甫人若攏及阮像款受割禮，阮就答應恁； |
| 34:16 | 阮將阮的查某子嫁互恁，阮嘛娶恁的查某子作某；阮住𫢶恁遮，成做仝一族。 |
| 34:17 | 恁若毋聽阮的話受割禮，阮就導阮小妹離開遮。」 |
| 34:18 | 哈抹及伊的子示劍歡喜接受此個條件。 |
| 34:19 | 彼個少年人隨時照𪜶的話去做，因為伊戀慕雅各的查某子。伊是𪜶老父的家上受尊重的。 |
| 34:20 | 哈抹及伊的子示劍來到城門口，給城內的人講： |
| 34:21 | 「諸個人是咱的朋友；咱的土地真闊，有夠通互𪜶徛起，做生理；咱通娶𪜶的查某子作某，嘛通將咱的查某子嫁互𪜶。 |
| 34:22 | 毋拘𪜶有一個條件，就是咱所有的查甫人攏著及𪜶像款受割禮，𪜶才欲及咱做夥住，成做仝一族。 |
| 34:23 | 咱若接受𪜶的條件，𪜶就會及咱做夥住，按呢，𪜶的牲生、財產，及𪜶所有的，豈毋是攏會變做咱的？」 |
| 34:24 | 此個城的住民攏接受哈抹及伊的子示劍的話；按呢，全城的查甫人攏受割禮。 |
| 34:25 | 到第三日，所有的人抵疼甲真艱苦的時，雅各兩個子，底拿的兄哥西緬及利未，攏攑刀，趁𪜶無防備，入城刣死攏總的查甫人。 |
| 34:26 | 𪜶刣死哈抹及伊的子示劍，給底拿對示劍的厝導出來，就離開。 |
| 34:27 | 雅各其他的子為著𪜶小妹受侮辱，就來到受刣的人遐，搶城內的物件， |
| 34:28 | 就是牛群、羊群、驢，以及城內及田野所有的。 |
| 34:29 | 𪜶閣將所有的財富、囝仔及婦仁人，以及厝內所有的物件攏搶去。 |
| 34:30 | 雅各給西緬及利未講：「恁連累我，會害我互此所在的迦南人及比利洗人怨慼。閣咱的人少，𪜶若聯合來攻擊咱，我及咱全家攏會滅亡。」 |
| 34:31 | 𪜶應講：「𪜶哪通款待阮小妹親像娼妓？」 |