| 章節 | 台語漢字本聖經 請按此下載安裝Open Han 2024版字型，免得漏掉造字 |
| 8:1 | 書念的婦仁人倒轉 有一個婦仁人以利沙曾互伊的子復活的，也曾給伊講：「起來你及你的全家去住你所通住的所在，因為耶和華命令飢荒臨到，欲佇此個所在七年久。」 |
| 8:2 | 婦仁人就起來，照上帝的奴僕的話去行，伊及伊的家去非利士人的地，住七年久。 |
| 8:3 | 七年滿，彼個婦仁人對非利士地倒來，就出去欲為家己的厝宅田園求叫王。 |
| 8:4 | 彼時王及上帝的奴僕的差用基哈西講話講：「請你將以利沙所行一切的大事給我講。」 |
| 8:5 | 基哈西啲給王講以利沙怎樣互死的人復活，湊巧彼個婦仁人就是伊互伊的子復活的，為著伊的厝宅田園來求叫王。基哈西講：「我的主我的王，此個是彼個婦仁人，此個是伊的子，就是以利沙互伊復活的。」 |
| 8:6 | 王問彼個婦仁人，伊就給伊講。王就為著伊派一個官員，講：「見若屬此個婦仁人的攏著還伊，對伊離開本所在到今仔日，伊的田園所出產的也攏著還伊。」 |
| 8:7 | 以利沙及便‧哈達王 以利沙來到大馬色，亞蘭王便‧哈達啲破病。有人給王講：「上帝的奴僕來到遮。」 |
| 8:8 | 王就給哈設講：「你帶禮物去見上帝的奴僕，拜託伊問耶和華，看我此個病會活抑𣍐？」 |
| 8:9 | 哈設就去見伊，用四十隻駱駝載大馬色逐號的好物做禮物，去徛佇伊的面前，講：「你的子亞蘭王便‧哈達差我來你遮，講：『我此個病會活抑𣍐？』」 |
| 8:10 | 以利沙給伊講：「你去回覆伊講，你的確會活；總是耶和華指示我，伊的確欲死。」 |
| 8:11 | 以利沙注目看伊，致到伊見誚。上帝的奴僕就流目屎； |
| 8:12 | 哈設講：「我的主啥事流目屎？」應講：「因為我知你所欲苦楚以色列人的，用火燒𪜶險要的所在，用刀刣死𪜶的壯丁，摔死𪜶的嬰仔，破開𪜶有娠孕的婦仁人。」 |
| 8:13 | 哈設講：「你的奴僕是甚麼，不過是一隻狗，豈可會行此個大事啊？」以利沙應講：「耶和華指示我，你欲做亞蘭王。」 |
| 8:14 | 伊離開以利沙，倒去伊的主人遐。主人問伊講：「以利沙給你講甚麼？」應講：「伊給我講你的確會活。」 |
| 8:15 | 隔日伊提厚的布搵水，蓋王的面，王就死。哈設就替伊做王。 |
| 8:16 | 猶大國的王耶和南 ( 代下 21:1-20 ) 以色列王亞哈的子約蘭第五年，約沙法做猶大王的時，猶大王約沙法的子耶和南起頭坐位。 |
| 8:17 | 耶和南坐位的時三十二歲，佇耶路撒冷做王歷過八年。 |
| 8:18 | 伊行以色列王的路，及亞哈的家無各樣；因為伊娶亞哈的查某子做某，行耶和華所看做歹的事。 |
| 8:19 | 總是耶和華因為伊的奴僕大衛的緣故，甘滅猶大，照伊所應允大衛的話，永遠賞賜一葩燈互伊的子孫。 |
| 8:20 | 當約蘭的年間，以東背叛猶大，脫離伊的手頭，家己設立王。 |
| 8:21 | 約蘭帶所有的戰車過去撒益，透暝起來，拍圍困伊的以東人及許個車長；百姓就逃走，逐個倒去伊的布棚。 |
| 8:22 | 按呢，以東人背叛猶大，脫離伊的手頭，到今仔日。像彼時立拿人也背叛。 |
| 8:23 | 約蘭其餘的事，見伊所行的，豈無攏記佇猶大列王的記錄嗎？ |
| 8:24 | 約蘭及伊的列祖同睏，佇大衛城及伊的祖同埋葬。伊的子亞哈謝續接伊做王。 |
| 8:25 | 猶大國的王亞哈謝 ( 代下 22:1-6 ) 以色列王亞哈的子約蘭十二年，猶大王耶和南的子亞哈謝起頭坐位。 |
| 8:26 | 亞哈謝坐位的時二十二歲，佇耶路撒冷做王一年，伊的老母名叫亞她利雅，是以色列王暗利的查某孫。 |
| 8:27 | 伊行亞哈的家的路行耶和華所看做歹的事，及亞哈的家無各樣，因為伊是亞哈的家的子婿。 |
| 8:28 | 伊及亞哈的子約蘭相及去基列的拉末，及亞蘭王哈設交戰。亞蘭人拍傷約蘭， |
| 8:29 | 約蘭王倒去耶斯列，欲醫治伊的傷，就是伊佇拉末及亞蘭王哈設交戰的時，亞蘭人拍著伊的。猶大王耶和南的子亞哈謝落去耶斯列欲覓亞哈的子約蘭，因為伊有破病。 |